Gjykata e Tiranës la në burg 58 nga personat të cilët u arrestuan si shpërndarës të drogave të forta në kryeqytet. Masat e sigurisë u ndryshuan vetëm për 3 vajza, të cilat nga masa e sigurisë “Arrest shtëpie”, caktuar më herët në mungesë, do të hetohen në masën “detyrim për t’u paraqitur”.
Një ditë më parë, togat e zeza lanë gjithashtu në fuqi masat e sigurisë edhe për 29 persona të tjerë, të akuzuar se në bashkëpunim shpërndanin lëndë narkotike në Tiranë, të ndarë në doza të vogla.
Gjatë kësaj të shtune, Gjykata e Vlorës gjithashtu mori në pyetje 10 nga 69 të arrestuarit dhe i la ata në masat e sigurisë “Arrest në burg”.
Gjatë seancës të hetuarit kanë mohuar implikimin në shpërndarjen e drogave, teksa disa prej tyre pretenduan se janë përdorues.
Edhe në Korçë, u lanë në qeli pa afat 10 persona nga 26 të arrestuarit në kuadër të të njëjtit operacion të akuzuar për shpërndarje droge në bashkëpunim.
