Këngëtarja Ruenca Haxhiaj, e njohur edhe me emrin e artit Enca, është vënë në pranga ditën e sotme pas një aksioni policor që i ka gjetur 5 vazo me kanabis të mbjella brenda banesës së saj.
Enca po mbahet aktualisht në ambientet e paraburgimit në “Mine Peza”, me akuzën e kultivimit të lëndëve narkotike. Ajo në deklaratën e parë të bërë para “bluve” nuk e mohoi kultivimin e bimëve, por tha se i ka për përdorim vetjak.
Sakaq, gazetarja Glidona Daci ka bërë një llogari, duke thënë se nga 5 vazo kanabis, Enca mund të nxirrte rreth gjysmë kilogram kanabis.
“Lënda narkotike e gjetur në ballkonin e banesës së Encës është në fazën që cilësohet 3 mujorshe, pra në fazën e pjekjes dhe në momentin që është duke çelur, kanabisi, ka një aromë më të fortë. Për secilën nga rrënjët, aty mund të dalin nga 75 deri në 100 gramë për rrënjë. Gjysmë kilogramë kanabis shkon në 5 vazo. Enca nuk ka dhënë shpjegime ku e ka marrë farën. Enca ka thënë se kanabisin e ka për përdorim vetjak. Në momentet e para në polici, ka dhënë këtë lloj shpjegimesh dhe për të mëtejshme ka thënë që do t’i japë në një fazë të dytë të hetimit se çfarë do të ndodhë. Enca aktualisht ndodhet në ambientet e paraburgimit, në Mine Peza në kryeqytet”, deklaroi ajo në emisonin “Rudina”.
Gazetarja Daci tha se partneri i Encës është marrë në pyetje, por më pas është lënë i lirë pasi autorësinë e mbjelljes së kanabisit e ka mbajtur vetë këngëtarja.
“Partneri i saj është lënë i lirë pasi banesa është në pronësi të Encës dhe pronësinë për mbjelljen e lëndëve narkotike e ka mbajtur vetë Enca. Partneri i saj është pyetur dhe më pas është lënë i lirë. Nëse rezulton përdoruese, duhet parë hapësira ligjore”, u shpreh ajo.
