Po shkon drejt pushimit hetimi penal në ngarkim të anëtarëve të fisit Rraja, të cilët dhunuan brutalisht dy kushërinjtë Jashar dhe Bilbil Maja më 6 Korrik.
Duke u bazuar në një raport të dyshimtë mjekoligjor, prokuroria e Tiranës lehtësoi akuzën ndaj nëntë dhunuesve nga plagosje e rëndë në plagosje të lehtë. Akuza e re kërkon ankim nga të dëmtuarit me qëllim që të vijojë hetimi në të kundër çështja penale ndaj Rraja mbyllet.
Këtë të martë, Jashar Maja tha se ka firmosur një dokument pa e parë, i cili ka rezultuar se është ai që konfirmon se nuk do të kryehejë ankim në mënyrë që hetimet ndaj Rrajave të vijojnë.
Në këto kushte, për nëntë të proceduarit Ineidi Rraja, Andi Rraja, Eni Kullaj, Përparim Rraja, Xhelal Rraja, Flamur Rraja, Rexhep Rraja, Klajdi Rraja e Edison Meta do të bjerë edhe akuza e plagosjes së lehtë.
Në një deklaratë për mediat, Jashar Maja tha se do të vijojë ta ndjekë çështjen në rrugë ligjore.
Ai u shpreh se nuk është dakort me ekspertizën, ndërsa shtoi se ende ka probleme shëndetësore nga dhuna e pësuar nga Rrajat. Jashar Maja tha se nuk lëviz dot i vetëm si pasojë e dëmtimeve të pësuara.
“Që të shtunën na ka informuar shefi i krimeve në Fushë-Krujë. Ne kemi shkuar në komisariat. Na ka bërë disa pyetje. Kërkonte me këmbëngulje shefi i krimeve që të bëjmë denoncim të ri. I thashë ‘o zotëri unë kam dhënë shpjegime në Prokurori dhe nuk kam pse të bëj denoncim të ri’. Nuk jam dakord me këtë akt-ekspertim. Ne do të shkojmë në SPAK, a nuk e di ku do shkojmë, se nuk kemi besim në këtë shtet. Gjithë ajo prokurori të bëjë gjithë këto gjëra ditën për diell, unë nuk e di kujt t’i ankohem. Unë nuk jam në gjendje, akoma më merren mendtë. Si e ka nxjerr ai prokuror atë vendim, rrahje të lehta. Unë kam automjetin në shtëpi, unë nuk jam në gjendje me dal në qendër me dal me ble bukë a diçka, shkoj me shoqërues”, tha Jashar Maja për News24.
“Prokuroria mund ta pushojë këtë çështje, unë do ndjek ku të kem të drejtën time. Unë nuk e di se çfarë ka thënë ai shef krimesh. Unë isha me një telefonatë dhe nuk kam qenë në vetëdije çfarë ka bërë e çfarë ka thënë. Më ka thënë që unë kam firmosur që jam njohur me akt-ekspertizën, po i thashë ok dhe kam firmosur. Nuk e kam lexuar, sepse kisha një ngjarje, një aksident. Nga ana financiare nuk kam mundësi të marr një avokat, por deri në SPAK do të shkoj a diku”, shtoi ai.
