Është shtyrë seanca për rivlerësimin e masës së sigurisë për Alma Kaçin, gruan e përfshirë në videoskandalin me ish-kryebashkiakun e Kukësit Safet Gjici.
Kaçi i është drejtuar GJKKO për vendosjen e një mase më të butë se ajo e “Arrestit me shtëpi”.
Në një prononcim për mediat, avokatja e saj deklaroi se vendimi për dhënien e masës së sigurisë është shtyrë por një datë tjetër, kur do të dorëzohën të gjitha hetimet e kryera deri tani nga prokuroria. Ajo shtoi se akuza për korrupsion aktiv nuk qëndron dhe masa e sigurisë për Alma Kaçin duhet të lehtësohet.
“Gjykata e shtyjë për një datë tjetër ku Prokuroria do depozitojë të gjitha hetimet që janë bërë deri tani. Dhe duke parë provat do vendosë nëse do lerë arrestin në shtëpi ose do ndryshojë masë. Deri më tani janë të njëjtat të dhëna që janë paraqitur në organin e akuzës, mund që në të ardhmen të kemi qëndrim ndryshe. Mund të dalin të dhëna të reja që janë nën efekt të hetimit. Korrupsioni aktiv nuk kemi, nuk ekzistojnë”, tha avokatja.
Ish-kryebashkiaku i Kukësi, Safet Gjici u arrestua më 24 qershor me akuzën e korrupsionit pasiv, ndërsa Alma Kaçi për korrupsion aktiv.
Kaçi dhe Gjici u shfaqën në një video ku diskutonin për një tender për kujdesin ndaj qeneve të rrugës, pas kryerjes së marrëdhënies intime.
