Një aksident në punë që i ka shkaktuar vdekjen një adoleshenti, ka ndodhur gjatë natës tek “Orange Club” në Sarandë.
Një 17-vjeçar i cili punonte si kamerier ka gjetur vdekjen rreth orës 01:15 pas mesnate në këtë klub nate. Sipas informacioneve nga policia, viktimën Antonio D. e ka zënë nga ashensori i klubit ku punonte, duke i shkaktuar vdekjen.
“Rreth orës 01:15 minuta të mëngjesit të sotëm, në lagjen ‘Nr. 1’, në lokalin në pronësi të shtetasit S.I., është këputur kavoja e ashensorit që përdorej kryesisht për furnizimin e lokalit duke zënë poshtë shtetasin A.D., 17 vjeç, (ndihmës/kamarier në këtë lokal). Për pasojë, 17-vjeçari ka humbur jetën”, njoftoi policia.
Lidhur me ngjarjen është arrestuar personi që ka montuar ashensorin – Lulzim Allkushi dhe është shpallur në kërkim pronari i “Orange”.
“Specialistët për Hetimin e Krimeve në Komisariatin e Policisë Sarandë arrestuan në flagrancë për veprën penale ‘Shkelja e rregullave të mbrojtjes në punë’, shtetasin L.A., 43 vjeç, banues në Sarandë si dhe shpallën në kërkim shtetasin S.I., 37 vjeç, banues në Sarandë. Nga veprimet hetimore të kryera ka rezultuar se 43-vjeçari i arrestuar kishte montuar ashensorin e lokalit, ndërsa 37-vjeçari i shpallur në kërkim është pronari i lokalit dhe vijon puna intensive për kapjen e tij. Materialet i kaluan Prokurorisë për veprime të mëtejshme për veprën penale ‘Shkelja e rregullave të mbrojtjes në punë’“, thuhet në njoltimin e bluve.
