Policia ka reaguar me anë të një komunikate për shtyp lidhur me aksidentin që ka ndodhur në orët e para të mëngjesit në zonën e liqenit Artificial të Tiranës.
Pavarësisht se drejtuesi i mjetit ka hequr targat para se ta braktiste “BMË” luksoze në pedonalen e liqenit, Blutë e kanë identifikuar atë si shtetasi Eldi Alushi nga qyteti i Durrësit.
26-vjeçari është aksidentuar rreth orës 05:15 të mëngjesit të kësaj të marte dhe menjëherë është larguar nga vendi i ngjarjes.
Sipas vlerësimeve të ekspertëve të policisë Rrugore, ai ka qenë duke lëvizur me shpejtësi skëterrë në rrugën e Kosovarëve.
Shoferi ka humbur kontrollin e mjetit dhe ka dalë jashtë rruge duke u ngjitur në skarpatin e digës së liqenit dhe më pas është përplasur me bordurën mbrojtëse.
“Më datë 22.08.2023, rreth orës 05:15, në Rrugën e Kosovarëve, dyshohet se automjeti tip “BMË” me drejtues shtetasin E. A., 26 vjeç, banues në Durrës, ka dalë jashtë rruge dhe është ngjitur në skarpatin e digës së liqenit, më pas është përplasur me bordurën mbrojtëse anës liqenit. Drejtuesi ka braktisur automjetin dhe është larguar nga vendi i aksidentit.
Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale, për veprat penale “Shkatërrimi i pronës” dhe “Largimi nga vendi i aksidentit”, njofton policia.
