Një aksident i rëndë rrugor në Turqi, i ka marrë jetën 12 personave.
Mediat vendase raportojnë se pas rrëzimit në një luginë të një autobusi në afërsi të Yozgat, ndërruan jetë në vend 12 nga pasagjerët, ndërsa 19 të tjerë kanë mbetur të plagosur.
Drejtuesi i autobusit që udhëtonte nga Sebastia për në Stamboll ka humbur kontrollin e mjetit.
Si pasojë mjeti ka kaluar në korsinë e kundërt të qarkullimit dhe ka rënë në një humnerë, nga rreth 30 metra lartësi.
Në autobusin fatkeq ndodheshin gjithsej 31 pasagjerë. Një nga pasagjerët e plagosur ka rrëfyer momentet e tmerrit për mediat turke nga spitali ku po trajtohet me ndihmë mjekësore. Cihat Çalişkan tha se ka hipur në autobus nga Akdağmadeni.
“Autobusi goditi menjëherë barrierat dhe për pak sekonda u soll duke u përplasur me pemët, herë djathtas dhe herë majtas. Teksa rrëshqisnim personi pranë meje ra jashtë. Kur u përplasëm me tokën rashë në dysheme dhe mbi vete kisha një djalë të ri. Pas kësaj nuk pashë askënd tjetër. Unë isha ppa ndjenja, u zgjova vetëm nga zhurma e të bërtiturave”, tha ai.
Shërbimet e urgjencës, përfshirë ekipet e shëndetësisë, policisë, xhandarmërisë dhe AFAD, kanë shkuar menjëherë në vendngjarje, sapo janë njoftuar për aksidentin tragjik.
