Festivali “Vajzë Fest 2023” do të mbahet për tre ditë dhe tre netë me radhë në Selinicë, ku do të ketë një shumëllojshmëri veprimtarie kulturore dhe artistike.
Kjo veprimtari organizohet nga Shoqata e fshatit Vajzë, në bashkëpuim me Bashkinë e Selenicë dhe Ministrinë e Kulturës dhe mbahet në datat 18, 19 dhe 20 gusht. Kjo festë mbahet në fshatin e Ali Asllanit, fshatin Vajzë, i cili të pret me një poezi në vend të mirëseardhjes: “Fshat o fshati im i bukur, fshati im hane, hane, fshati që s’paska një të dytë, në këtë mavri jallane.”
Vajza është fshat me legjenda, me folklor të pasur, me këngë! Me njerëz bujarë, me zemër të madhe e dashuri për njeriun. Dhe me duar të arta.
Në juglindje të qytetit të Vlorës, me karakteristikat e një kalaje natyrore, rrugica të ndërtuara tërësisht me gurë, ngritur mbi rrënojat e Amantias, me bahçe e kodra të gjelbëruara.
Në këtë festë do ketë shfaqje të filmave, kryesisht me temë fshatin, nën shoqërinë e një regjizori, apo aktori të ftuar, shfaqjen teatrore “Hanko Halla” (që e ka vënë në skenë Armand Boraj), një shfaqje teatrore për fëmijë, biseda me aktorët e regjizorët e ftuar, si dhe recitime prej tyre të disa poezive të Ali Asllanit, këngë polifonike të grupit të fshatit, shfaqje të disa dokumentarëve, filmave artistikë me temë fshatin, apo filmave me metrazh të shkurtër, të përgatitur nga studentë të Akademisë së Arteve etj etj.
Të ftuar specialë do të jenë P. Milkani, N.Xhepa, A.Minga, A.Bualioti, T.Flloko, Y.Mujo, A.Trebicka, P.Malaj, H.Mustafaraj, E.Milkani etj, të cilët do të akomodohen gjatë këtij eventi në shtëpitë e fshatit. Gjithashtu do të ngrihen edhe çadra kampingu për studentët e Akademisë së Arteve apo për të rinjtë që do të dëshirojnë t’i bashkohen eventit. Gjatë këtyre tre ditëve do të ketë edhe veprimtari të ndryshme argëtuese.
Çfarë do të shikosh?
Ujëvara e “Rasalit” në Velçë, me një bukuri mahnitëse të pazbuluar më parë. Shpellat e Velçës, nga banorët e fshatit, nga gojëdhënat e trashëguara nga të parët e tyre, tregojnë se ky fshat ka mbi 300 shpella që i datojnë periudhës para erës sonë, ndër to “Shpella e Velçës”, e cila është një nga vendbanimet shpellore të periudhës prehistorike e zbuluar rreth viteve 1930 nga një mision arkeologjik Italian.
Në Parkun Arkeologjik “Amantia”, dikur qendër e rëndësishme e Ilirisë së Jugut, me një jetë ekonomike dhe shoqërore të gjallëruar dhe një kulturë materiale dhe shpirtërore të admirueshme. Rruga për në park, është një panoramë.
Të gjithë ju që jeni nga Vajza, por jo vetëm, nëse po pushoni në Jug, bashkohuni me festivalin e parë të këtij fshati, që nuk do të jetë i fundit. Ky festival do të hapë dritaret për një nga fshatrat më poetik e jashtëzakonshëm, të Lumit të Vlorës.
