Vrasja e kandidatit për president Fernando Villavicencio pas një tubimi elektoral në Quito ka ngritur në këmbë instancat shtetërore që i kanë shpallur luftë bandave në 60 ditët e gjendjes së jashtëzakonshme.
Autoritetet kanë nisur nga puna për gjetjen e porositësit të krimit, që u finalizu nga atentatori i ekzekutuar kolumbian dhe grupi i tij i arrestuar. Sipas mediave në Ekuador 4.000 ushtarë dhe policë janë duke zhvilluar një operacion në burgun ku mbahet Fito, kreu i bandës më të fuqishme të Ekuadorit, të cilin kandidati i vrarë për president Villavicencio e kishte akuzuar se e kërcënonte.
Forcat e sigurisë me automjete të blinduara bastisën burgun numër 8 të Guayaquil, ku Jose Adolfo Macias, ose Fito, kreu i bandës “Los Choneros”, është i burgosur që nga viti 2011.
Në një foto të publikuar nga autoritetet, Fito shfaqet me duart në kokë. Në një foto tjetër, ai shihet i shtrirë në tokë me të brendshme së bashku me një numër të madh të burgosurish të tjerë.
Emri i tij është në faqet e para të gazetave ekuadoriane pas vrasjes të mërkurën e kaluar të Fernando Villavicencio, 59 vjeç, një kandidat për president, i cili doli i dyti në sondazhet për zgjedhjet presidenciale të 20 gushtit.
Javën e kaluar, ai tha se kreu i burgosur i bandës, i cili po vuan një denim me 34 vite për vrasje dhe trafik droge, e kishte kërcënuar se do ta vristem pasi Villavicencio si gazetar kishte hetuar tregtinë e drogës në Ekuador.
Gjashtë kolumbianë janë arrestuar në lidhje me vrasjen, ndërsa një tjetër u vra nga të shtënat me armë nga truprojat e kandidatit.
