Bjellorusia filloi të hënën një stërvitje ushtarake pranë kufirit të saj me Poloninë dhe Lituaninë, një lëvizje kjo që vjen mes tensionesh tashmë të rritura mes saj dhe dy anëtarëve të NATO-s, lidhur me mercenarët e grupit Wagner të Rusisë, që ndodhen në Bjellorusi pas rebelimit jetëshkurtër.
Si Polonia ashtu edhe Lituania kanë rritur masat e sigurisë në kufi, që kur mijëra luftëtarë të Wagner mbërritën në Bjellorusinë, vend ky aleat me Rusinë, sipas një marrëveshjeje që i dha fund rebelimit të tyre të armatosur në fund të qershorit dhe i lejoi ata dhe udhëheqësin e tyre, Yevgeny Prigozhin, të shmangnin akuzat penale.
Udhëheqësit e dy vendeve të NATO-s kanë thënë se janë të përgatitur për provokime nga Moska dhe Minsku në një zonë të ndjeshme ku të dy vendet kufizohen me Bjellorusinë, si dhe me enklavën ruse të Kaliningradit.
Polakët lëshuan akuza në fillim të gushtit ndaj Minskut, pasi dy helikopterë bjellorusë fluturuan për një kohë të shkurtër në lartësi të ulët në hapësirën ajrore polake. Autoritetet bjelloruse mohuan hyrjen e helikopterëve të tyre në Poloni.
Ministria e Mbrojtjes e Bjellorusisë tha se stërvitja që filloi të hënën bazohet mbi përvojat nga “operacioni special ushtarak”, term ky që Rusia po e përdor në luftën e saj në Ukrainë.
Ministria tha se stërvitja përfshin “përdorimin e dronëve, si dhe ndërveprimin e ngushtë të njësive të tankeve dhe mjeteve të motorizuara me njësitë e degëve të tjera të forcave të armatosura”.
Stërvitja luftarake po zhvillohet në rajonin Grodno të Bjellorusisë, pranë të ashtuquajturit Hendeku Suwalki, një rrip toke me pak popullsi, që përshkon 96 kilometra përgjatë kufirit polako- lituanez. Ai i lidh tre shtetet baltike të Lituanisë, Letonisë dhe Estonisë, me pjesën tjetër të aleancës së NATO-s, si dhe ndan Bjellorusinë nga Kaliningradi, një enklavë ruse e militarizuar rëndë në Detin Baltik, që nuk ka lidhje tokësore me Rusinë.
Analistët ushtarakë në Perëndim e kanë parë prej kohësh Hendekun e Suwalki-t si një zonë të mundshme të pikës së ndezjes në çdo konfrontim midis Rusisë dhe NATO-s.
Ata shqetësohen se Rusia mund të përpiqet të kapë hendekun dhe t’i shkëpusë të tre shtetet baltike nga Polonia dhe vendet e tjera të NATO-s.
Ushtria e Bjellorusisë ka thënë se po përdor në mënyrë aktive mercenarë rusë për të trajnuar trupat e saj. Stërvitjet filluan pasi më shumë luftëtarë të Wagner thuhet se mbërritën në vend.
Sipas Belaruski Hajun, një grup aktivistësh që gjurmon lëvizjet e trupave në Bjellorusi, mercenarët po mbërrijnë në grupe të vogla çdo ditë.
Gray Zone, një blog i lidhur me Wagner në aplikacionin e mesazheve Telegram, raportoi të hënën se rreth 7,000 luftëtarë Wagner ndodhen në një kamp afër Asipovich, një qytet 230 kilometra në veri të kufirit ukrainas. Pretendimi nuk mund të verifikohej në mënyrë të pavarur.
