11 gushti mund të konsiderohet pa frikë si dita e lindjes së hip hopit. Në këtë datë, revolucioni më i madh muzikor, kulturor dhe industrial i dekadave të fundit mbush plot 50 vjeç.
Ndryshe nga zhanret e tjera muzikore, në këtë rast kanë qenë institucionet amerikane që kanë sanksionuar aktin themelues.
Në 2021-shin, Senati amerikan jo vetëm shpalli nëntorin si ditën e celebrimit të hip hopit, por dhe pranoi se festa e organizuar më 11 gusht në perëndim të Bronksit , ku di xheji Kool Herc luajti me disqe për qindra persona, ishte hapi i parë në këtë lloj arti.
Për faktin se është pikërisht Kool Herc themeluesi i hip hopit ka pak dyshime. Këtë e pranon edhe Grandmaster Flash, rivali i tij i parë dhe figurë kyçe për lindjen e këtij zhanri.
Laboratori i këtij revolucioni ka qenë Bronksi, që në vitet ‘70 ishte një nga zonat urbane më të degraduara dhe më të rrezikshme në botë, e përdorur në filma dhe seriale televizive.
Dy themeluesit, Kool Herc, emri i vërtetë i të cilit është Clive Campbell dhe Grandmaster Flash, ose Joseph Saddler, ishin të dy emigrantë. I pari vinte nga kryeqyteti i Xhamajkës, Kingston; ndërsa i dyti nga Brixhtaun, në Barbados.
Ishin pikërisht ata, që pavarësisht teknikave dhe stileve të ndryshme, nuhatën potencialin e konceptit të ri të riprodhimit teknik.
Historia ka treguar se hip hopi është një kulturë që bën bashkë elementë të ndryshëm si grafitet, vallëzimin e stilit brake dance, repin dhe di xhejët.
Stop hip hopi është një industri miliardere dhe dominuese, që ka evoluar në mijëra zhanre dhe nënzhanre që variojnë nga stilet më komerciale deri tek ato më eksperimentale.
Ajo ka krijuar një model të ri fame dhe një brez të ri yjesh që janë kthyer në sipërmarrës, edhe pse kur e themeluan, Kool Herc dhe Grandmaster Flash nuk e kishin menduar kurrë se eksperimentet e tyre po i jepnin jetë një perandorie të re.
