Prej ditës së nesërme, datë 29 Korrik, maturantët do të mund të aplikojnë për listën e degëve që duan të studiojnë. Aplikimet për në universitet do të zgjatin deri më 3 Gusht.
Përmes portalit U-Albania, ata mund të zgjedhin 10 degët, ku syzojnë të fitojnë universitetin. Rezultatet e provimeve, mesatarja, por edhe statistikat e viteve të kaluara i ndihmojnë maturantët që të orientohen më mirë në degët që duan dhe degët që mund të arrijnë.
Paraprakisht maturantët duhet të paguajnë një tarifë në vlerën e 2 mijë lekëve në degët e Postës Shqiptare apo në banka të nivelit të dytë e më pas regjistrojnë 10 degët e tyre të preferuara në portalin U-Albania.
Përmes një postimi në rrjetet sociale, Ministria e Arsimit, ju bëri dhe njëherë thirrje maturantëve që të ndjekin studimet në universitetet në Shqipëri, si dhe të kenë vëmëndjen e tyre, drejt degëve me prioritet kombëtar, në të cilat mund të përfitojnë përjashtim nga tarifat dhe bursë mujore sa paga minimale.
Maturantët që do të zgjedhin një nga 35 degët e shpallura prioritet, si Gjuhë-letërsi, Matematikë, Fizikë, Veterinari do përjashtohen nga tarifa e shkollimit dhe stimulohen me bursë.
Maturantët kanë mbi 32 mijë kuota në dispozicion. Në degën Mjekësi e përgjithshme janë 465 kuota, prej të cilave 400 janë për maturantët brenda vendit dhe 65 për maturantët nga trojet, Medvegja, Preshevë dhe Bujanovc. Në disa programe studimi kriter është nota mesatare.
Universitetet që kanë konkurse apo teste shtesë brenda javës së parë të Gushtit bëjnë publike emrat e aplikantëve. Këtë vit akademik edhe Mjekësia do të ketë test shtesë për maturantët, i cili pritet të zhvillohet në datat 10-20 Gusht.
