Dinamo nis një epokë të re me rikthimin në elitën e futbollit shqiptar.
18 herë kampionët e vendit kanë filluar nga puna për sezonin e ri dhe vijnë me ndryshime rrënjësore si në nivelin e drejtimit, edhe në atë të organizimit.
Klubi ka marrë vendimin drastik për të ndryshuar thuajse gjithçka.
‘Supersport’ raporton se Dinamo do të ndryshojë emrin, logon dhe mënyrën e menaxhimit të skuadrës.
Dinamo City do të jetë emri i ri i bluve ndërsa ndryshime do të pësojë edhe uniforma e ekipit.
Në vendin ku shkruhet sponsori kryesor, do të jetë ‘Durrës Yachts & Marina’, kjo pasi iniciatorët që kanë ndërmarë këtë projekt janë po ata që kanë marrë përsipër projektin e qytetit të Durrësit.
Ajo çka e bën edhe më interesante gjithë këtë iniciativë është se Dinamo nuk do të jetë më ekip i qytetit të Tiranës, por do të zhvendosen në rrethinat e Durrësit ku do të kenë 70 mijë metra tokë në të cilën do të ndërtohet qendra stërvitore.
Dinamo City do të jetë në bashkëpunim edhe me akademinë e Manchester City, teksa para pak muajsh u nënshkrua marrëveshja me qeverinë shqiptare.
Igli Tare do të ketë një rol të rëndësishëm në këtë organizim teksa do të ndihmojë në ndërtimin e një klubi modern duke zbuluar kështu arsyen e vërtetë të vizitës së tij në miqësoren ndaj Skënderbeut ditën e djeshme.
E krijuar pas Luftës së Dytë Botërore nga Ministria e Brendshme në Tiranë, Dinamo është klubi i tretë i madh i kryeqytetit por pasi mbeti pa shtëpi dhe për shumë vite pa një klub të qartë prapa krahëve, tashmë marka e njohur e futbollit shqiptar do të marrë një drejtim të ri.
