Katër anëtar të familjes së saj janë emëruar në Prokuroinë e Tiranës, por sipas deputetes sociale, Ermonela Felaj është e shpifur që opozita të merret me familjen e saj.
Gjatë replikave në Kuvend me demokratët Sali Berisha, Albana Vokshi dhe Luan Baçi, Felaj deklaroi se katër familjarët e saj janë emëruar në bazë të meritës, dhe jo të përkatësisë politike të saj. Gjithsesi, Felaj harron se reforma në drejtësi u bë pikërisht për depolitizimin e prokurorive dhe gjykatave.
“Nëse duhet të jem unë këtu apo jo, nuk e vendosni ju, e kanë vendosur të tjerë njerëz. Zonja Vokshi mos e mbani të bllokuar foltoren, kjo është komplet e stisur, është e disata herë që e bëni.
E kuptoj që vini nga bashkimet profesionale e kultura e vjetër komuniste e të marrurit të familjarët është në ADN-në tuaj. Ta dish ti dhe të gjithë të tjerët, ato tituj nuk na i ka dhënë politika por arsimi. Se magjistrat nuk të bën politika por shkolla, nuk jemi plepista. Nuk jemi nga listat e Sali Berishës kur ishte president. Ulu! Mos i sillni familjarët këtu se është shumë e shpifur.
Duhet të largoheshit ju dhe familja juaj nga ky vend që jeni shpallur non grata për korrupsion masiv. Jam krenare për veten dhe familjen time, i kam shërbyer këtij shteti, në biografinë tonë nuk gjen asgjë të zezë, kurse ti je krejt i zi”, u shpreh Felaj.
Përgjatë katër viteve të fundit, në Prokurorinë e Tiranës janë emëruar tashmë tre familjarë të deputetes Felaj. Në mars të vitit 2019, KLP vendosi të emërojë si prokuror në Tiranë përmes një procedure të diskutueshme bashkëshortin e deputetes, Bledar Valikajn, pa kaluar më parë procesin e vetingut. Vetëm pak muaj më vonë, në maj 2019, Prokuroria e Përgjithshme përzgjodhi pas një procedure konkurruese vëllanë e deputetes, Armando Felaj si oficer të policisë gjyqësore në Prokurorinë e Tiranës. Në mbledhjen plenare të datës 29 maj, u miratua projektakti për transaferimin e bashkëshortes së këtij të fundit, Alma Felaj, nga Prokuroria e Durrësit në atë të Tiranës.
Por nuk mbaron me kaq. KLP miratoi të martën më 27 qershor me 10 votat e anëtarëve të pranishëm projektaktet për renditjen e kandidatëve për tre pozicione vakante në Prokurorinë e Tiranës, ku në të tre rastet e para në listë u rendit prokurorja e Vlorës, Eranda Felaj.
Ajo është motra dhe familjarja e katërt e deputetes së Patisë Socialiste, Ermonela Felaj, e cila pritet të emërohet në Prokurorinë e Tiranës.
