Në Shqipëri sektori i turizmit ka shfaqur, gjatë muajve të parë të këtij viti, shenjat e një rritje të shpejtë dhe të konsiderueshme, me ndikim në ekonominë e vendit. Nisur nga të dhënat statistikore të deritanishme për ecurinë e turizmit dhe projeksionet nga rezervimet për këtë sezon veror, eksperti i këtij sektori, Sokol Hoxha, thotë se viti 2023 pritet të jetë me treguesit më të lartë si përsa i përket sektorit të turizmit bregdetar, ashtu edhe atij malor, duke tejkaluar kështu ndjeshëm periudhën e para pandemisë.
“Ky është viti i Shqipërisë për rritjen e numrit të turistëve. Detyra e Shqipërisë është që t’i mirëpresë këta turistë. Dhe detyra e të gjithë institucioneve është që t’i shërbejnë sa më mirë këtyre turistëve. Sepse, turizmi është shërbim. Kjo situatë është çdo ditë e më e vështirë, nga të gjitha hallkat; institucionet, mungesa e krahut të punës. Është shtrenjtuar gjithçka, çmimet janë rritur. Dhe është një përgjegjësi shumë e madhe e të gjithëve bashkë që të dalim faqebardhë”.
Sipas të dhënave të Ministrisë së Turizmit dhe Mjedisit, në 5 muajtë e parë të këtij viti Shqipëria është vizituar nga rreth 2 milion e 400 mijë vizitorë të huaj, ose 42% më shumë se e njëjta periudhë e vitit të kaluar. Strukturat hoteliere thuajse janë mbuluar tërësisht me pronotime deri në fundin e muajit shtator.
Profesori i Universitetit të Shkodrës, Elvis Krymi, thotë se ajo që po i tërheq më së shumti turistët e huaj është natyra thuajse e paeksploruar e Shqipërisë, si në bregdet, ashtu edhe në zonat malore.
“Një prej arsyeve kryesore që po i tërheq turistët nga të gjitha vendet, qoftë nga Europa, qoftë edhe nga vende të tjera, është natyra, peisazhi i Shqipërisë nga Veriu deri në Jug. Një pjesë e mirë e turizmit nuk është vetëm frekuentimi i turizmit bregdetar, por është edhe turizmi malor”.
Në situatën e rritjes së shpejtë të kërkesës në sektorin turistik të vendit, profesor Krymi thotë se pushteti vendor dhe qendror, së bashku me biznesin, duhet të bashkëpunojnë për të zgjidhur problematikat që aktualisht ka ky sektor, një pjesë e të cilave për shkak të emigrimit të forcave të punës.
“Unë mendoj se mungesë ka që në aspektin e burimeve njerëzore, qoftë edhe të infrastrukturës. Dhe aspektit të shërbimit, që është edhe gjëja më kryesore që sot ne po e vuajmë realisht. Është një trend i ri, është një model i ri. Dhe ne duhet të përgatitemi për këtë pjesë”.
Ndërkohë, zoti Hoxha thotë se, rritja e shpejtë e numrit të turistëve, si në bregdet, ashtu edhe në zonat malore, rrezikon të dëmtojë këtë sektor të rëndësishëm të ekonomisë së vendit nëse nuk shoqërohet me rritjen e cilësisë së shërbimeve dhe ruajtjen e traditës.
“Ne na duhet të ruajmë traditën, të ruajmë cilësinë, sepse, të themi të drejtën, edhe mbipopullimi nuk i shërben cilësisë. Sepse, ato janë kapacitetet e vilave, shtëpive, bujtinave. Prandaj, unë them se mbipopullimi ul pak cilësinë. Gjithashtu, si operator turistik, unë shikoj se duhet për t’i informu sa më shumë turistët që vijnë”.
Sipas të dhënave të fundit të Ministrisë së Brendshme të Shqipërisë, nga janari deri më 21 qershor, në pikëkalimet kufitare të Shqipërisë kanë hyrë dhe dalë rreth 2 milion e 500 mijë shtetas të huaj më shumë se e njëjta periudhë e një viti më parë. Gjatë vitit të kaluar, turistët shpenzuan rreth 2.8 miliardë euro, shifër kjo që pritet të tejkalohet gjatë këtij viti. VOA
