Qeveria ka shkarkuar nga detyra e kryebashkiakut të Kukësit Safet Gjicin, këtë të Premte. Lajmin e konfirmoi ministrja e Finacave Delina Ibrahimaj.
Këtë të premte, pas publikimit të video-skandalit të Safet Gjici, u zhvillua një mbledhje qeverie në përfundim të së cilës disa prej ministrave prezantuan një pjesë të vendimeve të marra.
E para që e mori fjalën ishte ministrja e Financave dhe Ekonomisë Delina Ibrahimaj, e cila pas prezantimit të një vendimi të marrë nga Këshillimi i Ministrave, u pyet lidhur me video erotike të Safet Gjicit:
A ka një qëndrim qeveria shqiptare sa i takon një kryetari të bashkisë që përfaqëson PS dhe filmohet në zyrën e shtetit duke kryer veprime të pahijshme?
“Sot në fakt këshilli i Ministrave mori një vendim për shkarkimin e menjëhershëm të kryetarit të bashkisë së Kukësit”, tha shkurtimisht Ibrahimaj.
Më herët, vetë Gjici njoftoi dorëheqjen përmes një postimi në faqen e tij në FB. Gjici ka pranuar që me vajzën që është shfaqur në video ka pasur një marrëdhënie intime prej disa kohësh, por nënvizon se gjesti është i pajustifikueshëm dhe ndaj ka vendosur të dorëhiqet.
Nga SPAK ka nisur një hetim pas publikimit të videos ku Gjici shfaqet duke kryer marrëdhënie intime me një femër në zyrën e tij në Bashkinë e Kukësit.
