Gjithmonë natyra na provon se është terapia më e mirë fizike dhe mendore. Sot në Ditën Botërore për Ndërgjegjësimin për Autizimin ju kujtojmë se disa nga terapitë alternative më të efektshme janë ato që krijojnë lidhjen me natyrën dhe kafshët.
Komunikimi me kafshët, veçanërisht me kuajt dhe delfinët janë provuar shkencërisht se përmirësojnë gjendjen emocionale, rregullojnë presionin e gjakut dhe ndihmojnë me zhvillimin e aftësive motorike. Akoma më shumë në rastin e fëmijëve autikë kafshët minimizojnë sjelljet stereotipe dhe rrisin dëshirën dhe aftësinë për t’u socializuar me të tjerët, zhvillojnë aftësitë e komunikimit dhe zvogëlojnë stresin emocional dhe ankthin, duke nxitur zhvillimin e individit në tërësi.
Komunikimi me gjitarët e detit është testuar në Britani nga shkencëtarët në vitin 1978 dhe u bë e përdorur gjerësisht në fillim të viteve ’90.2
Delfinët përdorin valët ultrasonike për të kërkuar dhe njohur objektet nën ujë. Gjithashtu, këto ultratinguj përdoren në mjekësi më së shumti si analgjezik, për lehtësimin e dhimbjeve fizike.
Ndërsa efekti terapeutik i hipizmit, përpos gjallërimit të mbi njëqind impulseve të ndryshme në një minutë është edhe qarkullimi më i mirë i gjakut për shkak të temperaturës së lartë trupore që kanë kuajt dhe që e përcjellin në trupin e individit që qëndron mbi kalë.
Gjatë hipizmit mund të përmirësohet edhe mbajtja e ekuilibrit, duke sinkronizuar dhe kordinuar lëvizjet e gjymtyrëve me lëvizje të pavarura që detyrojnë të dy hemisferat e trurit të punojnë në të njëjtën kohë.
Hippotherapy (terapia me kuaj) veçanërisht në autizëm ndihmon edhe për të zhvilluar kujtesën, vëmendjen dhe procesin e të menduarit.
