Presidentja e Kosovës, Vjosa Osmani ka deklaruar se Asociacioni i komunave me shumicë serbe, duhet të jetë në përputhje të plotë me Kushtetutën e Kosovës dhe për këtë janë në koordinim të vazhdueshëm me Shtetet e Bashkuara të Amerikës dhe Bashkimin Evropian.
Nëse zyrtarët e BE-së sipas saj kërkojnë që në statutin për Asociacionin të merren parasysh propozimet e ardhura nga Beogradi, ka rrezik të shkohet drejt defunksionalizimit të shtetit.
“Kosova nuk i ikë obligimeve të saj por në të njëjtën kohë ne kërkojmë që të gjithë partnerët tonë ndërkombëtar të jenë të qartë sa i përket shkeljeve të cilat i ka bërë Serbia në raport me marrëveshjet e arritura në Bruksel dhe në Ohër, respektivisht, neni 4 i marrëveshjes i cili kërkon që Serbia të mos kundërshtoj anëtarësimin e Kosovës në asnjë organizatë ndërkombëtare.
Për këtë arsye ne do të koordinohemi vazhdimisht me SHBA dhe BE dhe nuk kemi asnjë interesim dhe as qëllim që të ikim nga obligimet tona por gjithnjë duke përsëritur që Asociacioni duhet patjetër të jetë në përputhje të plotë me Kushtetutën e Kosovës dhe me vendimin e Gjykatës Kushtetuese të vitit 2015 dhe në asnjë moment mos të ketë ndonjë element që ta bëjë shtetin e Kosovës jofunksional,” tha ajo.
Osmani ka potencuar se Kosova është e interesuar të vazhdoj raportet e mira me të gjitha vendet e Ballkanit perëndimor dhe integrimin në Bashkimin Evropian dhe kjo është ajo që i bashkon vendet.
