E njohur si një zonë me risk të lartë për kultivimin e kanabisit, Vlora mbetet në vëmendjen e policisë përsa i përket parcelave të mbjella mes pyjeve të dendur, që zbulohen kryesisht përmes dronit.
Por, ajo çka ka habitur jo pak agjentët e policisë ishte zbulimi për herë të parë në qytetin bregdetar i një parcele në ambient të hapur, ku ishin kultivuar 70 bimë të dyshuara si opium.
Policia sqaron në njoftimin për mediat se zbulimi i parcelës është arritur falë denoncimeve të qytetarëve dhe në pranga ka rënë 54-vjeçari Tolem Lamaj, i dyshuar si kultivuesi i opiumit.
“Gjatë këtij operacioni, në fshatin Drithas, në një ambient të hapur, në tokën e shtetasit T. L., u konstatuan të kultivuara 70 bimë të dyshuara narkotike opium, të cilat pas veprimeve procedurale dhe hetimore, u sekuestruan në cilësinë e provës materiale. Në vijim të veprimeve procedurale, u bë arrestimi në flagrancë i shtetasit T. L., 54 vjeç, banues në fshatin Drithas, i dyshuar si kultivuesi i bimëve narkotike opium”, njofton policia.
Materialet procedurale për rastin në fjalë i kaluan Prokurorisë, për veprime të mëtejshme.
