Bashkia e Kukësit është drejt përfundimit në numërimin e kutive të votimit, të cilat deri më tani mbajnë në avantazh kandidatin e Partisë Socialiste dhe Safet Gjici ka shpallur fitoren, ndërsa në qytet ka nisur festa e mbështetësve të tij.
Gjici mposht në këtë garë të ngushtë për Kukësin, kandidatin e koalicionit opozitar “Bashkë Fitojmë”, Admir Sinamati, i cili ka reaguar nëpërmjet rrjeteve sociale duke shprehur keqardhje që nuk mundi të sjellë ndryshimin.
Por, në postimin që duket me nota të larta reflektimi, Sinamati nuk harron të shprehë revoltën e tij ndaj vendimit të Lulzim Bashës, për të lënë të papërfaqësuar opozitën në zgjedhjet e vitit 2019.
Kjo pasi, sipas kandidatit të ‘BF’, me pushtetin e falur në zgjedhjet e shkuara të majtët përfituan duke akumuluar para korrupsioni, të cilat i përdorën në këtë proces zgjedhor për të blerë masivisht vota nga qytetarët e varfëruar.
Sinamati gjithashtu ka një thirrje, duke kërkuar që Zoti të ruajë shqiptarët e ndershëm nga ky pushtet i blerë i socialistëve.
Reagimi i Admir Sinamatit:
Çfarë ndodhi ?!
Pushtetin e falur nga ish opozita e shndërruan në dhunë e para të pista të korrupsionit, e me to blenë një pjesë të opozitës dhe votën e një pjese të varfëruar të qytetarëve prej pushtetit të tyre, për ta transferuar sot në pushtet dhune e për t’ua nxirë jetën atyre dhe gjithë të tjerëve përgjatë 4 viteve!
Lutje!
Ruaji Zot shqiptarët e ndershëm prej atyre me pushtet të blerë e votuesve të shitur në treg të lirë!
Falenderoj qytetarët kuksianë që më besuan mua dhe nuk u mposhtën prej dhunës, presionit dhe blerjes!
Ndjehem keq që pavarësisht pritshmërive të mëdha nuk ia solla dot ndryshimin Kukësit !
Kam besim se ende ka shpresë që Demokracia do të triumfojë dhe së shpejti e drejta do të fitojë!
