Deputetët demokratë, Endri Hasa, Ervin Salianji dhe Klevis Balliu, janë drejtuar gjatë ditës së sotme për në Drejtorinë e Policisë Tiranë, për të qënë një krah mbështetës për protestuesit që u ndaluan nga blutë e Tiranës.
Specialistët e Seksionit për Krimet ndaj Jetës dhe Pronës në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësore Tiranë, në vijim të veprimeve për evidentimin, dokumentimin dhe kapjen e shtetasve që kundërshtuan me dhunë punonjësit e policisë gjatë protestës së opozitës të zhvilluar në datën 18 dhjetor 2017, para Kuvendit të Shqipërisë, kanë bërë arrestimin në flagrancë të:
• Renato Xhihani, 19 vjeç, lindur dhe banues në Kavajë;
• Ervis Hajredini, 21 vjeç, lindur dhe banues në Lushnjë;
• Igli Hasani, 24 vjeç, lindur dhe banues në Lushnjë;
• Fanol Prifti, 40 vjeç, lindur dhe banues në Lushnjë;
• Sokol Vuçeta, 46 vjeç, lindur dhe banues në Shkodër (i dënuar më parë);
• Shyqri Proshka, 33 vjeç, lindur dhe banues në Kavajë.
“Arrestimi u bë pasi gjatë protestës së djeshme, zhvilluar në sheshin në hyrje të Kuvendit të Shqipërisë nga subjekti politik Partia Demokratike e Shqipërisë, personat e sipërcituar, në mënyrë aktive kanë kryer veprime të dhunshme, si hedhja e sendeve të forta në drejtim të punonjësve të policisë, hedhja e materialeve piroteknike, si dhe kanë kundërshtuar me dhunë punonjësit e policisë në përmbushjen e detyrës, vepër penale e parashikuar nga neni 236/2 i Kodit Penal”.
