Kjo e shtunë shënoi plot 1 muaj nga dita kur në qytetin e Sarandës janë zhdukur dy 46-vjeçarët Fatmir Sulovari (alias Fatmir Krasniqi) dhe Leonard Thodhori, i njohur me nofkën “Koçole”.
Që prej 6 prillit, disa operacione policore janë kryer në qytetin bregdetar, e po ashtu disa protesta nga ana e familjarëve për të kërkuar trupat e familjarëve të tyre, për të cilët dyshojnë se janë ekzekutuar.
Gjithashtu nga detajet hetimore rezulton se ka dyshime të forta që trupat e dy të zhdukurve janë groposur në zonën e Konispolit, ndërsa kërkimet për ta në fshatin Vrinë nuk rezultuan efikase.
Sakaq, referuar rastit në fjalë, gazetari Enrik Mehmeti zbuloi gjatë një interviste për emisionin “Revieë” në Euroneës Albania, se policia shqiptare ka kërkuar ndihmën e homologëve kosovarë për të zhvilluar kërkime me qen të specializuar për gjetjen e trupave të viktimave.
Gazetari theksoi se policia dyshon se dy personat e zhdukur janë ekzekutuar dhe janë varrosur në një zonë pranë Ksamilit.
“Policia shqiptare ka kërkuar ndihmë nga policia e Kosovës, pasi ata kanë qenë të specializuar për të gjetur erën e trupit të njeriut. Aty po kërkohen trupat e viktimave dhe është e vështirë të jetë kryer shkrirja e trupave në acid. Aty po kërkohen trupa dhe qentë nga Kosova janë qenë që përdoren dhe në tërmete, që ndiejnë erën e njeriut. Ka pasur dhe kërkime nga pala shqiptare por pa rezultat, dhe kjo është arsyeja pse ka hyrë në lojë Kosova”, tha Mehmeti.
Mehmeti gjithashtu tha se familjarët e të zhdukurve dinë diçka më shumë të cilën nuk e thonë, pasi ata kërkuan që në fillim gjetjen e trupave të viktimave dhe jo gjetjen e të zhdukurve.
Gazetari shtoi se pista më e mundhsme është për pazaret e drogës dhe jo për shitjen e dyfishtë të një prone që kap vlerën e 2 milionë lekëve të reja.
“Familjarët janë ata që dinë shumë më shumë në lidhje me këtë ngjarje. Në fakt janë ata të parët që kanë kërkuar për trupa. Kanë qenë disi të bindur se të afërmit e tyre tashmë ishin vrarë. Dhe familjarët kanë shumë më shumë informacion. Për rrëmbimin për pronën nuk e besoj, pasi flitet për një shitje të dyfishtë të një prone që kap një vlerë prej 2 milionë lekë të reja, që në një kohë porositja e një vrasjeje shkon minimum 50 mijë euro.
Këto lloj vrasjesh nuk e mendoj që të investohen për të rrëmbyer dy persona për një shumë të tillë. Pista më e besueshme është ajo e trafikut të lëndëve narkotike”, tha Mehmeti.
