Një aksident masiv është regjistruar pasditen e sotme në autostradën Tiranë-Durrës, në afërsi të mbikalimit të Sukthit.
Mësohet se të paktën pesë makina janë përplasur me njëra-tjetrën në varg, duke shkaktuar dëme të konsiderueshme materiale.
Burimet paraprake njoftojnë se nga aksidenti, fatmirësisht nuk ka patur të lënduar.
Dyshohet se shkak për aksidentin masiv është bërë edhe trafiku i rënduar në autostradë, teksa kryeqytetasit dhe shumë qytetarë të Kosovës kanë zgjedhur t’i drejtohen Durrësit për të shijuar motin e mirë dhe temperaturat e larta të kësaj të shtune.
Sakaq, bëhet me dije se policia ndodhet në vendin e ngjarjes dhe po punon për zbardhjen e plotë të rrethanave të këtij aksidenti masiv.
