Një 52-vjeçar që vuante dënimin në burgun e Fierit ka ndërruar jetë në orët e para të mëngjesit të sotëm. Mësohet se Simon Toska, ka shfaqur shqetësime dhe komplikacione shëndetësore teksa ndodhej në qeli.
Ka qenë shoku i dhomës ai që ka konstatuar problemin shëndetësor të 52-vjeçarit dhe ka njoftuar autoritetet, të cilat kanë marrë masat për ta dërguar në spital.
Megjithatë, 52-vjeçari ka mbërritur pa shenja jete në spitalin e Fierit dhe shkak i vdekjes është bërë një arrest kardiak.
Për ngjarjen ka reaguar me një njoftim edhe Drejtoria e Përgjithshme e Burgjeve, ku nënvizohet se Toska një ditë më parë kishte shfaqur lodhje dhe dobësi trupore, duke u asistuar nga infermierët e spitalit të burgut.
Sakaq sqarohet se, që nga momenti kur është pranuar në burgun e Fierit ku do të kryente dënimin për veprën penale “Prodhim dhe shitje e narkotikëve”, 52-vjeçari nuk ka referuar për ankesa klinike akute dhe nuk ka marr ndonjë trajtim me medikamente për patologji kronike.
Njoftimi i Drejtorisë së Burgjeve:
Drejtoria e Përgjithshme e Burgjeve, informon opinionin publik se me datë 04.05.2023, rreth orës 04:00 në Spitalin Rajonal Fier ka ndërruar jetë shtetasi Simon Hashim Toska, i datëlindjes 15.04.1972, i akuzuar për kryerjen e veprës penale “Prodhim dhe shitje e narkotikëve” të parashikuara nga neni,(283/2) i Kodit Penale.
– Shtetasi Simon Hashim Toska, është pranuar në IEVP Fier me masë sigurie arrest me burg, me datë 13.08.2021 dhe pas vizitës shëndetësore është pajisur me kartele klinike numër 4253.
– Që në momentin e pranimit ky shtetas është konsultuar me mjekët e institucionit, ku nuk ka referuar për ankesa klinike akute. Gjatë qëndrimit në institucion ky shtetas nuk ka paraqitur ankesa klinike dhe nuk ka marr trajtim me medikamente për patologji kronike.
– Me datë 03.05.2023, rreth orës 12:00 shtetasi Simon Toska ka referuar për lodhje dhe dobësi trupore. Presioni arterial 100/70 mm Hg, pulsi arterial në normë. Në këto kushte iu vendos një perfuzion, ku më pas referoi që ndjehej mirë dhe në gjendje të stabilizuar, nuk referoi për ankesa klinike.
– Më datë 04.05.2023 në orën 03:25 gjatë patrullimit në sektor punonjësi i policisë me shërbim njofton në radio punonjësit e shërbimit shëndetësor në detyrë, se i paraburgosuri Simon Toska ka probleme me frymëmarrjen. Pas njoftimit rreth orës 03:30 infermierët e shërbimit së bashku me grupin e sigurisë shkojnë në dhomën e shtetasit Simon Toska, në godinën e paraburgimit. Ky shtetas ka referuar për probleme, vështirësi në frymëmarrje, presioni arterial 90/60 mm Hg. Menjëherë i është dhënë ndihma e parë shëndetësore, i është aplikuar medikamenti (1 ampul) prednizolon dhe është rekomanduar të dërgohet në urgjencën e Spitalit Rajonal Fier.
– Në orën 03:34 ky shtetas është nisur për në urgjencën e Spitalit Fier, ku edhe gjatë rrugës është asistuar me masazh kardiak. Në urgjencën e Spitalit Rajonal Fier, i është dhënë ndihma mjekësore (goditja me kardio- version), në EKG konstatohet asistoli. Me gjithë ndihmën mjekësore që i është dhënë këtij shtetasi, mjekët e Spitalit Fier konkluduan se, shtetasi Simon Toska ka bërë exitus letalis (vdekje).
