Sulmi me dhunë dhe grabitja e një 60-vjeccari kinez në mbrëmjen e 6 korrikut 2022 në Brozzi, në periferi të Firences, ka bërë që një 39-vjeccar shqiptar të shpallet në kërkim nga policia italiane.
Pas disa muajsh në arrati ai është ndaluar mbrëmjen e 24 prillit në qytezën e Pratos.
Sa i përket ngjarjes së vitit të shkuar, 39-vjeçari e kishte parë viktimën të paguante faturën në një dyqan sanduiçësh, duke vënë në dukje se portofolin e kishte plot me kartëmonedha.
Më pas ai e ka ndjekur me makinë deri në rrugën “di Brozzi”, ku, me kapelën e ulur mbi fytyrë është hedhur në aksion.
Ai e ka kapur “mat” viktimën kur doli nga makina, duke e goditur me grushte dhe shuplaka derisa ai ra në tokë.
Më pas shqiptari i mori portofolin me 900 euro dhe 4 karta krediti e çelësat e një “Mercedesi” të parkuar aty pranë.
39-vjeccari akuzohet për vjedhje të rëndë dhe plagosje. Viktima, e cila u rrëzua në tokë, prej grushteve humbi 3 dhëmbë dhe pësoi një traumë kraniale dhe ënjtje të shumta të fytyrës.
Në momentin e grabitjes, britmat e viktimës, punonjës i një kompanie prodhimesh lëkure, i cili u rrëzua përtokë i plagosur, alarmuan një banore që arriti të shënonte pjesërisht numrin e targës së makinës së autorit, çka çoi edhe në zbulimin e tij nga karabinierët.
