Detaje të reja dalin në dritë në lidhje me hetimin për vrasjen e biznesmenit Ardian Nikulaj. Siç është raportuar më parë, që kur ndodhi ngjarja në ambientet e lokalit ka qenë edhe një person me shtetësi angleze dhe banim në Londër.
Nga verifikimet e sistemit TIMS, anglezi rezulton të ketë hyrë në Shqipëri më 14 prill dhe është larguar mbrëmjen 19 prillit, vetëm 5 pas orë pas ngjarjes. Ai ka qëndruar në Shqipëri vetëm 5 ditë, por dyshimet kanë lindur, pasi ai ka qenë duke pirë kafe brenda lokalit në momentin e ngjarjes dhe menjëherë pas të shtënave është larguar.
Në dëshminë e dhënë përpara grupit hetimor, pronari i hotelit në Shëngjin, ku qëndroi shtetasi anglez, ka thënë se pas ngjarjes ai është larguar i shqetësuar.
“Nuk do të kthehem më kurrë në Shqipëri”, ka thënë shtetasi anglez, sipas dëshmisë së pronarit të hotelit.
Ndërkohë, për të shkuar në aeroport anglezi përdori dy taksi. Fillimisht mori taksinë e parë nga Shëngjini në Fushë-Krujë dhe taksinë e dytë nga Fushë Kruja në Rinas.
Sipas “BalkanWeb”, ky person është marrë në pyetje në Britaninë e Madhe, pasi autoritetet shqiptare i kishin bërë kërkesë homologëve anglezë për marrjen në pyetje të tij.
Mësohet se ditën e djeshme anglezi është pyetur rreth qëndrimit të tij në Shqipëri dhe arsyeve se pse kishte shkuar në Shëngjin. Ai gjithashtu është pyetur rreth ngjarjes ku ai ishte dëshmitar okular, ndërsa autoritetet shqiptare po presin përgjigjen nga homologët anglezë lidhur me çështjen.
Zhvillime të reja ka edhe sa i përket automjetit tip “Land Rover Defender” që është pikasur nga kamerat e sigurisë në fshatin Kukël dhe ku dyshohet se është larguar autori pasi lëvizi me motor nga vendi i ngjarjes.
Grupi hetimor në bazë të këqyrjes së pamjeve filmike ka dyshime se në mjetin “Defender” kanë qenë tre persona, autori dhe dy persona të tjerë. Por, grupi hetimor ende nuk ka prova nëse motori është futur brenda në “Defender” edhe pse ka dyshime që mund të jetë futur aty, por po hetohet edhe pista që motori mund të jetë futur në një mjet tjetër.
Sa i përket verifikimeve të mjetit “Defender”, në vendin tonë qarkullojnë një numër i pakët mjetesh të tilla të regjistruara, gjë që mund të bëjë që grupi hetimor ta ketë më të lehtë verifikimin e mjetit, autorësinë e mjetit dhe se kur dhe si ka hyrë në vendin tonë, pasi mjeti ishte me targa te huaja.
