Vrasja e biznesmenit Ardian Nikulaj në ambientet e lokalit të tij në Shëngjin mbetet ende e pa zbardhur plotësisht nga policia dhe pa autor pas hekurave, por pistat ku po hetohet janë të shumta.
Një prej tyre është përqendruar te influenca e lartë politike që 50-vjeçari ka pasur në qarkun e Lezhës, aty ku sa herë afrohen zgjedhjet ka konflikte dhe tension.
Edhe sipas ish-drejtuesit të lartë të Policisë së Shtetit, Arben Hajdarmataj ngjarja mund të ketë background të theksuar politik, pasi Nikulaj kandidonte për këshillin bashkiak dhe renditej në listën e PSD-së së Tom Doshit.
Sipas Hajdarmatajt nuk përjashtohet mundësia që biznesmeni diku mund t’i ketë prishur balancat politike, pasi në garën për kryetarin e bashkisë së Lezhës mbështeste këtë herë kandidatin e opozitës, Pashk Gjoni.
Komentet i tij mbi ngjarjen Hajdarmataj i bëri për Panorama TV, ku tha se Nikulaj kohët e fundit kishte pasur konflikte me kundërshtarë politikë dhe sipas tij, dyshohet se lëvizte me makinë të blinduar.
“Mendoj se të paktën edhe një tjetër person ka qenë. Nuk mund të jetë vetëm një person që të bëjë të mundur organizimin e atentatit. Të paktën një tjetër person e orienton dhe i jep koordinatat e sakta atentatorit. Aspekt tjetër është aspekti politik. Në 2021 ka qenë kandidat për deputet i PSD-së. Fakti që ka kaluar filtrin e KQZ-së në 2021, mendoj se nuk ka të bëjë me begraunde kriminale, etj.
Në aspektin politik, unë do të thoja se në njëfarë mase i ka prishur balancat politike. Nga informacionet që kemi, Nikulaj ka mbështetur herë një krahë e herë tjetrin. Në 14 maj ai po mbështeste kandidatin e koalicionit “Bashkë Fitojmë” dhe kjo pastaj i jep pak ngjyrim politik kësaj pune”, u shpreh ai.
Ndërkohë, në vijim Hajdarmataj theksoi se Policia e Shtetit nuk mund të fshihet ferrave e të merret e të presë të kapë ndonjë makinë që qarkullon me shpejtësi, por duhet fillimisht të merret me këto probleme reale të rendit.
