Detaje të reja kanë dalë në dritë për vrasjen e ndodhur mesditën e sotme në ambientet e lokalit “Coral”, ne pedonalen e Shëngjinit, ku u ekzekutua biznesmeni Ardian Nikulaj.
Ai është vrarë në ambientet e biznesit në pronësi të tij, teksa ishte ulur duke konsumuar një kafe.
Të paktën dy persona besohet se kanë qenë të përfshirë në ngjarje, por vetëm njëri prej tyre, i cili shihet në një foto nga momenti kur kryen vrasjen, ka hyrë brenda lokalit, i veshur me një jelek fosforeshent dhe skafandër në kokë.
Dyshohet se autori u kamuflua me uniformë policie dhe jelek të verdhë për të mos ngritur dyshime tek viktima dhe për t’i shpëtuar efektivëve.
Autori është drejtuar nga Ardian Nikulaj dhe në moment të parë për shkak të veshjes së tij është menduar mos ishte punonjës, por ai ka nxjerrë armën duke qëlluar në drejtim të 50-vjeçarit, duke e pasur të qartë shënjestrën e tij.
Drejt viktimës është qëlluar me pistoletë me silenciator të paktën 6 herë, me dy nga plumbat që e kanë prekur në kokë dhe trup, duke i shkaktuar vdekjen e menjëhershme.
Brenda lokalit në momentin kur ndodhi vrasja ka qenë biznesmeni 50-vjeçar që mbante postin e kryetarit të PSD-së për qarkun e Lezhës, një kamarier i lokalit dhe një roje sigurie që ka qenë tek dera e jashtme.
Prokuroria dhe policia kanë një sërë pistash në tryezë për të hetuar dhe njëra prej tyre është ajo e gjakmarrjes, pasi në vitin 2010 vëllai i Ardian Nikulajt është ekzekutuar nga pjesëtarë të fisit Panaj. Gjithçka kishte të bënte me një përplasje të vjetër mes dy fiseve në qarkun e Lezhës, ku pas ekzekutimit të vëllait të biznesmenit, nga fisi Panaj janë vrarë dy persona dhe autorët nuk u gjetën kurrë.
Sakaq, dyshohet se atentatorët e Nikulajt pasi janë larguar nga vendi i ngjarjes me një motorçikletë, më pas kanë lëvizur drejt Tiranës me një automjet tip “Range Rover” me ngjyrë të zezë dhe me targa angleze.
Policia ka ngritur pika kontrolli në hyrje dhe dalje të Lezhës, ndërkohë që është rrethuar edhe zona ku vijojnë kontrollet për kapjen e autorit apo autorëve.
Ndërkohë, mësohet se 50-vjeçari që mbeti i vrarë prej disa kohësh udhëtonte me makinë të blinduar.
Nikulaj rezulton i arrestuar më herët për armëmbajtje pa leje dhe kontrabandë e falsifikim.
50-vjeçari, i cili ka mbajtur postin e drejtorit të ALUIZNI-t në Lezhë dhe ka qenë në zgjedhjet e vitit 2021 kandidat për deputet i PSD-së së Tom Doshit, njihej si person me influencë të madhe politike në këtë qark.
