Këngëtari problematik Kleviol Ahmeti, i njohur në rrjetet sociale me nofkën “Cllevio Serbiano” është arrestuar paraditen e sotme në aeroportin e Rinasit.
Mësohet se “Cllevio”, i cili prej disa muajsh shijon lirinë duke marrë pjesë edhe në disa koncerte, është vënë në pranga pasi është kallëzuar penalisht nga reperi i njohur Rigels Rajku “Noizy”.
Sipas denoncimit të bërë në polici më 13 prill, Noizy dhe babai i tij pretendojnë se janë kërcënuar në rrjetin social “Tik Tok” nga Kleviol Ahmetaj.
“Klevio më ka shkaktuar ankth dhe frikë. Më ka përndjekur. Duhet ta ndaloni”, mësohet se ka thënë Noizy në polici kur ka paraqitur denoncimin.
Kjo nuk është hera e parë që Kleviol Ahmeti dhe Rigels Rajku përfshihen në një sherr. Ata kanë qenë gjithmonë në përplasje në rrjetet sociale, në një histori ku herë uleshin tonet dhe herë kaloheshin limitet në të shara dhe ofendime nga ana e reperit nga Lushnja.
Madje, “Cllevio” u vu në pranga dhe përfundoi pas hekurave vitin e shkuar kur theu masën e sigurisë “arrest me burg”. 36-vjeçari nga Lushnja doli nga banesa dhe shkoi në Durrës, ku edhe u konfliktua fizikisht me reperin Noizy.
Njoftimi:
DVP Durrës/Vihen në pranga 5 shtetas, për vepra të ndryshme penale, njëri prej tyre në kërkim.
Shtetasi K. A. është ndaluar në Rinas, në hyrje të Republikës së Shqipërisë, nga shërbimet e Komisariatit Rinas, pasi ishte shpallur në kërkim nga Komisariati i Policisë Durrës.
Materialet i kaluan Prokurorisë, për veprime të mëtejshme.
