Shoferi i furgonit me targa angleze që u bllokua dy ditë më parë në portin e Durrësit, pasi u zbuluan armë dhe municione të fshehura brenda një tavolinë që transportonte, është lënë në burg sot nga gjykata.
Mësohet se Jetmir Kaloshi është shprehur para togave të zeza se nuk ka dijeni mbi 8 pistoletat “Glock”, që thuhet se destinacion kishte Britaninë pasi firma e transportit të cilës i përket furgoni ka selinë në Luton, Bedfordshire.
35-vjeçari i akuzuar për “trafikimi të armëve dhe municioneve” ka pretenduar se ishte vetëm shofer dhe nuk kishte lidhje me materialet e gjetura në furgon, por GJKKO caktoi ndaj tij masën ‘arrest me burg’.
“Unë do i dorëzoja në Itali dhe pastaj do kthehesha. Nuk kam vizë për në Britaninë e Madhe”, mësohet të jetë shprehur shoferi.
Kaloshi ka pretenduar se ishte i punësuar pranë një agjencie si shofer, ndërsa shtoi se nuk ishte në dijeni për mallrat që duhet të transportonte.
