Tri ditë me radhë, Kina ka simuluar ushtrime ushtarake me armë të vërteta shumë pranë Tajvanit.
Tre ditë në të cilat tensioni midis Kinës dhe Tajvanit (dhe rrjedhimisht edhe Shteteve të Bashkuara) është rritur frikshëm. Për Pekinin, ky është një akt hakmarrjeje për takimin mes Presidentit Tsai Ing-wen dhe atij të Dhomës së Përfaqësuesve të SHBA-së, Kevin Mçarthy.
Sapo nisën stërvitjet, Uashingtoni i kërkoi Pekinit “moderim”, duke theksuar se “kanalet tona të komunikimit me Republikën Popullore të Kinës mbeten të hapura dhe ne vazhdimisht kemi bërë thirrje për mos ndryshim në status quo”.
“Ne kemi besim se kemi burime dhe aftësi të mjaftueshme në rajon për të garantuar paqen dhe stabilitetin dhe për të përmbushur angazhimet tona të sigurisë kombëtare”, tha një zëdhënës i Departamentit të Shtetit, i cili shtoi se Shtetet e Bashkuara po “monitorojnë nga afër veprimet e Pekinit”.
Autoritetet e ishullit janë të alarmuar. Ministria e Mbrojtjes regjistroi 59 avionë luftarakë, 39 prej të cilëve kaluan vijën mesatare të ngushticës së Tajvanit dhe 11 anije të ushtrisë kineze vetëm në harkun kohor të katër orëve. Tajvani është i rrethuar. Ose të paktën ky është qëllimi i stërvitjeve kineze, siç raportohet nga Komanda Lindore e Ushtrisë Çlirimtare Popullore.
Risia është se kësaj radhe avionët e Pekinit janë pajisur me “armë reale” dhe kanë kryer “sulme të simuluara pranë Tajvanit”.
“Avionët luftarakë H-6K janë të shumtë, me municion të vërtetë dhe po kryejnë valë të shumta sulmesh të simuluara në objektiva të rëndësishëm”, thuhet në një shënim që nënvizon se në stërvitje ka marrë pjesë edhe aeroplanmbajtësja Shandong.
Anijet amerikane vihen në lëvizje
Marina amerikane njoftoi sot se shkatërruesi i raketave “USS Milius” kreu një mision mbi të drejtat dhe liritë e lundrimit në Detin e Kinës Jugore, pranë ishujve Spratly, të pretenduara nga Pekini.
“Ky operacion përputhet me ligjin ndërkombëtar”, specifikoi Marina e SHBA.
Megjithatë, të një mendimi krejtësisht të ndryshëm janë autoritetet kineze, të cilët nxituan të thonë: “Shkatërruesi i raketave ‘Uss Milius’ ka hyrë ilegalisht në ujërat ngjitur me shkëmbin nënujor Meiji në ishujt kinezë të Nansha, pa miratimin e qeverisë kineze”.
“Forcat Ajrore të Pekinit kanë qenë duke ndjekur anijen”, tha një zëdhënës i ushtrisë kineze.
Objektivi i stërvitjeve kineze
Raportimet e mediave në Pekin flasin për ushtrime me stil madhështor. Sipas ÇTV, Kina ka simuluar sulme të përbashkëta precize kundër objektivave kyçe në ishullin e Tajvanit dhe ujërat përreth. Televizioni shtetëror raporton gjithashtu se Forcat Ajrore kanë vendosur dhjetëra avionë për të “fluturuar në hapësirën ajrore të synuar” dhe se forcat tokësore kanë kryer stërvitje për “sulme me saktësi me shumë objektiva”.
Vetëm në ditën e parë të stërvitjeve, 71 avionë dhe nëntë anije detare nga Kina kryen inkursione në zonat përreth Tajvanit gjatë manovrave të kryera nga ushtria kineze në zonat afër ishullit sipas Ministrisë së Mbrojtjes tajvaneze.
Në stërvitje nga Pekini janë angazhuar avionët luftarakë SU-30, J-10 dhe J-11. Siç shpjegon në mënyrë triumfale televizioni shtetëror kinez, ushtrimet synojnë të masin aftësinë e Pekinit për të “marrë kontrollin e detit, të hapësirës ajrore në mënyrë që të krijojë parandalim dhe rrethim total” të Tajvanit.
