Një aksident me pasojë vdekjen e një personi është regjistruar në Lushnje, në orët e para të mëngjesit të sotëm.
Policia bën me dije se një automjet tip karrotrec ka përplasur për vdekje një 50 vjeçar, i cili dyshohet se është endacak.
Drejtuesi i mjetit, një 27 vjeçar është shoqëruar në polici pas aksidentit tragjik.
Njoftimi i policisë:
Rreth orës 03:00, në aksin rrugor “Rrogozhinë-Lushnjë”, në afërsi të fshatit Zhamë, automjeti tip “Karrotrec”, me drejtues shtetasin M. Ç., 27 vjeç, banues në Levan, ka aksidentuar një shtetas rreth 50 vjeç, ende të paidentifikuar (dyshohet endacak), i cili ka ndërruar jetë.
Shtetasi M. Ç. është shoqëruar në ambientet e Policisë, për kryerjen e veprimeve të mëtejshme procedurale.
Grupi hetimor po punon për përcaktimin e shkaqeve të aksidentit dhe identifikimin e shtetasit që ka ndërruar jetë.
