Depresioni dhe çrregullimet mendore të Roland Sinanit, dyshohet të jenë arsyet kryesore që shtynë 43-vjeçarin të vriste kunatën e tij (nusen e vëllait) e më pas veten, brenda banesës së familjes në Shkozë.
Ngjarja e rëndë në kryeqytet ndodhi rreth orës 04:00 të mëngjesit, ku 43-vjeçari ka shfrytëzuar kohën kur i vëllai ishte në punë (taksist në kryeqytet) dhe prindërit e tyre të moshuar në gjumë, për t’i marrë jetën Migena Sinanit.
Bëhet po ashtu me dije se pasi vrau kunatën, 43-vjeçari doli në oborr dhe i dha fund jetës së tij.
Mësohet se 37-vjeçarja është nënë e dy fëmijëve të mitur dhe në momentin kur është qëlluar nga kunati, ka qenë duke fjetur në shtrat me vajzën e saj 2 vjeçe. Ndërkohë, fëmija tjetër i së ndjerës ka qenë duke fjetur në shtratin e gjyshërve.
Sakaq, këta të fundit janë marrrë në pyetje nga hetuesit, por janë shprehur se ishin në gjumë dhe nuk kanë dijeni për detaje nga ngjarja e rëndë me dy viktima. Ata janë shfaqur të tronditur dhe në gjendje të rënde psikologjike.
Kjo prej faktit se Roland Sinani qëndronte në banesën e prindërve ku jetonte dhe vëllai, teksa ishte pikërisht kunata që vrau ajo që i shërbente, i lante rrobat e i gatuante prej vitesh.
Sa i përket bashkëshortit të 37-vjeçares, ai punonte turn i tretë si taksist, ndërsa gjatë ditës ishte i punësuar në një servis automjetesh.
Fqinjët janë shprehur për mediat se familja Sinani ishte e tërhequr dhe nuk kishin shumë komunikim, por për bashkëshortin e 37-vjeçares të ndjerë konstatojnë se është një njeri i qetë, që sheh punët e tij.
Grupi hetimor prej disa orësh ndodhet në vendngjarje dhe po punohet për zbardhjen e arsyeve që çuan 43-vjeçarin drejt këtij krimi të rëndë që tronditi familjen Sinani.
