Një ngjarje e rëndë ka ndodhur në kryeqytet në orët e para të mëngjesit të sotëm. Një 43-vjeçar ka vrarë me armë zjarri kunatën, e më pas i ka dhënë fund jetës së tij.
Sipas policisë, “rreth orës 04:00 të mëngjesit, në Shkozë, në banesë, shtetasi R. S., 43 vjeç, në rrethana ende të paqarta dyshohet se ka vrarë me armë zjarri kunatën (nusen e vëllait) shtetasen M. S., rreth 37 vjeçe dhe më pas ka vrarë veten”.
Autori i ngjarjes së rëndë është identifikuar si shtetasi Roland Sinani. Me një pistoletë ai i ka marrë jetën kunatës (nuses së vëllait) Migena Sinani, 37 vjeçe dhe më pas ka qëlluar edhe veten.
Burimet bëjnë me dije se i vëllai nuk ka qenë në banesën ku ka ndodhur krimi, pasi punonte si taksist në kryeqytet.
Sa i përket 43-vjeçarit, ai ishte i pa martuar dhe merrte mjekim pasi kishte probleme të shëndetit mendor, por jetonte në një shtëpi me vëllain (bashkëshorti i Migenës) dhe me dy prindërit e moshuar të tyre, të cilët sipas deklarimeve paraprake kanë qenë në gjumë dhe nuk kanë parë sesi ka ndodhur ngjarja.
Ndërkohë, në banesë është sekuestruar edhe arma e zjarrit pistoletë.
Depresioni dhe çrregullimet mendore të Roland Sinanit, dyshohet të jenë arsyet kryesore që shtynë 43-vjeçarin të vriste kunatën e tij (nusen e vëllait) e më pas veten, brenda banesës së familjes në Shkozë.
43-vjeçari ka shfrytëzuar kohën kur i vëllai ishte në punë (taksist në kryeqytet) dhe prindërit e tyre të moshuar në gjumë, për t’i marrë jetën Migena Sinanit.
Bëhet po ashtu me dije se pasi vrau kunatën, 43-vjeçari doli në oborr dhe i dha fund jetës së tij.
Mësohet se 37-vjeçarja është nënë e dy fëmijëve të mitur dhe në momentin kur është qëlluar nga kunati, ka qenë duke fjetur në shtrat me vajzën e saj 2 vjeçe. Ndërkohë, fëmija tjetër i së ndjerës, djali 4 vjeç ka qenë duke fjetur te gjyshërit (prindërit e Migenës).
Grupi hetimor ndodhet në vendngjarje dhe vijon veprimet me qëllim zbardhjen e rrethanave dhe dokumentimin ligjor të ngjarjes.
