Ish-kryeministri italian Silvio Berlusconi mëngjesin e sotëm është shtruar me urgjencë në spitalin “San Raffaele” të Milanos.
ANSA raporton se ai ka hyrë në terapi intensive, pasi i janë shfaqur probleme kardiovaskulare, teksa fillimisht kishte mbërritur me probleme respiratore.
Situata e ish-kryeministrit aktualisht është stabile, por ky shtrim i dytë i Berluskonit në të njëjtin spital vetëm 6 ditë pasi doli prej aty më 30 mars, ngre shqetësime mbi shëndetin e tij.
Berluskoni ishte shtruar më parë në spitalin “San Raffaele” në janar 2022, kur iu nënshtrua një sërë kontrollesh që zgjatën tetë ditë.
Rreth një vit e gjysmë më parë, ai kishte vuajtur nga disa komplikime të rënda të lidhura me COVID-in, të cilat ai vetë i përcaktoi si “eksperiencën më të keqe” të jetës së tij.
I infektuar në shtator 2020, virusi e kishte detyruar “Kavalierin” të shtrohej në spital për gati dy javë, duke e kthyer më pas në spital për gati një muaj, deri në maj 2021, për shkak të pasojave të sëmundjes.
Pasi kaloi me sukses një operacion shumë të rëndë në zemër të hapur në qershor 2016, në janar të dy viteve më parë ai u shtrua në spitalin e Qendrës Kardio Torakale të Principatës së Monakos për një problem aritmie.
Një aksident i vogël në familje kishte ngjallur shqetësim në shkurt 2021, kur lideri i Forza Italia ishte rrëzuar brenda rezidencës së tij në Romë.
