Prej orës 10:00 të kësaj të paradites së kësaj të hëne, në gjykatën speciale në Hagë ka nisur procesi gjyqësor ndaj ish krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimit.
Liderët e luftës po akuzohen për krime lufte dhe krime kundër njerëzimit, akuzë për të cilën ata janë deklaruar që në nisje të seancës se nuk e pranojnë dhe kanë nënvizuar se janë të pafajshëm.
Ndërkohë që seanca vijon dhe pritet të zgjasë rreth 5 orë, për të mbështetur ish-krerët e UÇK-së, jashtë ambienteve të gjykatës janë mbledhur mijëra qytetarë të Kosovës që jetojnë në diasporë, duke bërë thirrje për lirinë e ish-krerëve të luftës.
Me brohoritjet “UÇK” që ushtojnë në Hagë, shqiptarët e diasporës të ardhur kryesisht nga Gjermania, Austria, Zvicra dhe Belgjika kërkojnë gjykim të drejtë për Thaçin, Veselin, Krasniqin dhe Selimin.
“Sot shihet që ka interesim të madh të bashkatdhetarëve nga të gjitha anët e Evropës, edhe nga Amerika e largët, protesta ka qëllimin vetëm për kërkim të drejtësisë, ne duam vetëm drejtësi dhe gjykim të drejtë të liderëve tonë të luftës dhe paqes”, tha Raif Istogu, njëri nga organizatorët e marshimit-protestë.
Ndërkohë protestuesi Isa Gashi tregoi për mediat kosovare se motoja e tyre sot është “Jo në emrin tim”.
Ish-krerët e UÇK-së ndodhen në qendrën e paraburgimit në Hagë prej nëntorit të vitit 2020. Në paraqitjet e tyre para gjykatësit të procedurës paraprake ata janë deklaruar të pafajshëm.
Ndërsa në mbështetje të tyre, në prag të fillimit të gjykimit, u mbajt në Prishtinë një marsh që pa të mblidheshin rreth 100 mijë qytetarë në shesh. Sakaq sot në Hagë, në mesin e qytetarëve është parë edhe djali i ish-kryetarit të PDK-së, Kadri Veseli.
