Mes mijëra qytetarëve pjesëmarrës në “Marshin për drejtësi” ishin dhe familjarët e ish-presidentit Hashim Thaçi dhe ish-kryetarit të Kuvendit e PDK-së, Kadri Veseli. Ata i kanë prirë marshit në solidarizim me ish-krerët e UÇK-së dhe më pas janë ngjitur dhe në binën ku janë mbajtur fjalimet.
Pjesë e këtij marshi ishin gruaja e Hashim Thaçit, Lumnija, djali Endriti; si dhe gruaja e Kadri Veselit, Violeta dhe dy fëmijët e tyre. Djali i ish-presidentit Thaçi- Endriti për një moment nuk ka arritur t’i mbajë lotët nga emocionet që përçoheshin përmes këtij marshi dhe të gjithë përkrahjes që iu dha babait të tij dhe ish-bashkëluftëtarëve të UÇK-së.
Kryetari i PDK-së, Memli Krasniqi, ka thënë se protesta e sotme “Liria ka emër”, u ndoq drejtpërdrejt nga ish-krerët e UÇK-së nga Haga, teksa ka ftuar qytetarët të duartrokasin dhe brohorasin UÇK. Krasniqi tha se sot “Marshojmë për Drejtësi” për t’u solidarizuar me çlirimtarët tanë, duke besuar fuqishëm se ata do të rikthehen fitimtarë.
“Në këto momente janë duke na përcjellur drejtpërdrejt çlirimtarët tanë nga Haga, Hashim Thaqi, Kadri Veseli, Jakup Krasniqi e Rexhep Selimi. Kjo pamje është mesazhi më i qartë se Liria ka emër dhe se UCK nuk zbehet as me gjeneratat e reja”, u shpreh Krasniqi. “Sot, ballëlartë e me zemër plot, marshojmë krenarë, për ata që dikur marshuan drejt lirisë.
Marshojmë për të kërkuar drejtësi, për ata që nga nesër do të përballen më një proces gjyqësor, në të cilin nuk janë për shkak të emrave të tyre të përveçëm, por për shkak të epokës së lavdishme që përfaqësojnë. Marshojmë për Hashim Thaçin, Kadri Veselin, Jakup Krasniqin, Rexhep Selimin dhe bashkëluftëtarët e tyre që sot janë larg nesh, duke e zhvilluar betejën e fundit, për dinjitetin dhe të vërtetën e luftës sonë për liri. Dhe duke besuar fuqishëm në drejtësi, nuk kemi dyshim se do të rikthehen si fitimtarë, ashtu siç erdhën dikur, si çlirimtarë, sepse janë heronj të gjallë, që përveç lirisë, s’kanë pasur një mision të dytë dhe përveç pavarësisë, s’kanë pasur një projekt rezervë” – tha Krasniqi.
“Lufta e popullit tonë për çlirim nuk ishte thjeshtë një ballafaqim ushtrish, por një luftë ndërmjet lirisë dhe tiranisë, ndërmjet drejtësisë dhe të padrejtës, ndërmjet shpresës dhe dëshpërimit. Dhe ne ishim të rreshtuar në anën e lirisë, drejtësisë dhe shpresës. Prandaj, po! Ne kërkojmë drejtësi, sepse për krimet e panumërta ndaj qytetarëve tanë, mijëra kriminelë serbë nuk kanë dalë kurrë para drejtësisë” – tha kreu i PDK-së.
Ai shtoi se lavdia e Ushtrisë Çlirimtare të Kosovës nuk mund pakësohet me kalimin e viteve, e as nuk tjetërsohet me ndryshimin e gjeneratave.
“Bashkimi jonë rreth një kauzë të drejtë është pikërisht ajo që i duhet më së shumti Kosovës, sepse vetëm kështu siç jemi sot, ia kemi dalë gjithmonë ta mbrojmë të vërtetën dhe ta kërkojmë të drejtën që na takon. Prandaj, nga zemra, ju jam mirënjohës gjithsecilit prej jush, që me ndërgjegje të lartë patriotike e kombëtare, me vetëdije të lartë qytetare e shtetërore, bashkë me familjet tuaja, jeni sot këtu, për t’ia dhënë një pamje të tillë Kosovës. Kjo pamje, është mesazhi më i qartë dhe më i drejtpërdrejtë, se liria jonë ka emër, dhe se lavdia e Ushtrisë Çlirimtare të Kosovës, nuk pakësohet me kalimin e viteve, e as nuk tjetërsohet me ndryshimin e gjeneratave” – tha ai.
