Kreu i Shtëpisë së Bardhë, Joe Biden, nuk pritet të marrë pjesë në kurorëzimin e mbretit Charles III. Kështu të paktën shkruajnë një sërë mediash britanike të cilat bëjnë me dije se Biden pritet të dërgojë një delegacion në këtë aktivitet.
Nuk dihet shumë se cilët përfaqësues të administratës amerikane do të zgjidhen për të marrë pjesë, por mendohet se në vend të Biden mund të shkojë Zonja e Parë, Jill Biden.
Pavarësisht refuzimit të ftesën, mediat britanike këmbëngulin se marrëdhënia e Kreut të Shtëpisë së Bardhë me Charles është “e fortë”.
Krerët e shteteve nga e gjithë bota do të jenë të pranishëm, duke përfshirë figura të rëndësishme të BE-së, si Ursula von der Leyen, Roberta Metsola dhe Charles Michel.
Megjithëse mungesa e tij në mesin e liderëve botërorë është disi e pazakontë, kjo nuk shënon rastin e parë. Gjatë kurorëzimit të mbretëreshës së ndjerë Elizabeth II, Dwight D. Eisenhower, asokohe presidenti i SHBA-së, nuk mori pjesë.
