Deputeti i Partisë Demokratike, Saimir Korreshi shprehet se përçarja e kësaj force politike për zgjedhjet e 14 majit do të krijojë konfuzion tek demokratët përsa i përket votimit të kandidatëve.
Në një intervistë për “Panorama TV”, Korreshi deklaroi se ai ka mbështetur idenë që grupi i Alibeajt, të dilte në zgjedhje vetëm për Këshillat Bashkiakë dhe të mbështeteshin kandidatët e Primareve për kryetarë bashkish.
Korreshi theksoi se në 16 bashkitë ku janë dy kandidatë, PD ka probabilitetin më të ulët për të fituar.
“Të 16 bashkitë ku kemi kandidatë, kanë probabilitetin më të ulët për të fituar. Atje ka dy kandidatë mundësia për të fituar është më e vogël. Kandidatët duhet të punojnë maksimalisht edhe me kryetarët e degëve. Ne në Lushnje kemi punuar kaq kohë për të gjetur një gjuhë të përbashkët. Ne do të mbështesim kandidatët e tjerë dhe nismën e tyre, Ne nuk i lëmë shokët dhe miqtë në baltë. Kanë nevojë për ndihmën tone”, tha ai.
Përsa i përket Lushnjes, Korreshi deklaroi se PD-ja e Alibeajt do garojë me listën e saj për këshillat bashkiakë, ndërsa do mbështesi kandidatin e primareve për të marrë drejtimin e kësaj bashkie.
“Unë në Lushnje i kam bërë vetë, jemi munduar të nxjerrim njerëzit më të mirë. Një listë dinjitoze me ish-anëtarë të këshillave bashkiakë. Lista është miratuar nga Kryesia e PD-së Lushnje. Dëshira ka qenë gjithëpërfshirja në këto lista. Dëshira ka qenë e madhe për të marrë pjesë. Lista është e degës Lushnje. Dega e Lushnjes nuk përfaqësohet me kryetarë. Ka qenë një vendim i konkluduar prej muajsh. Ne nga procesi i 6 marsit, kandidatët e Lushnjes treguan se nuk kapin as votat e 25 prillit. Ne bëmë një hap pas, gjykuam se skemi pse të bëhemi sebep për një humbje të dytë. Ne menduam se nuk mund të bëheshim barrë dhe pengesë të demokratëve që Berisha nuk donte të negocionte me ne. Vendosëm të mbështesim kandidatin që ka mbështetjen e pjesës tjetër të demokratëve. Ne s’mund t’i bëhemi pengesë pasi provat i dhamë në 6 mars. E mira do ishte të mos vlerësohej më sigla e Bashës, Berishës apo Alibeajt, por sigla e PD-së. Kjo gjë nuk u arrit dot. Me lista do dalim të ndarë për këshillat bashkiakë. Më vjen keq që në listën e Berishës ka shumë kandidatë nga Partia e Lirisë. Po i bëhet një qokë e madhe. E vetmja gjë që solli kjo përçarje është dalja me dy lista për këshilltarë,” tha Korreshi.
