Sulmi me armë zjarri në Top Channel, ku mbeti i vrarë roja i sigurisë, 60-vjeçari, Pal Kola, është raportuar edhe nga mediat rajonale.
Media serbe ‘N1’ raporton ngjarjen, teksa shton se sulmi nuk ka ende një autor.
Artikulli:
Një punonjës i kanalit shqiptar “Top Channel” ka mbetur i vrarë mbrëmjen e djeshme, pasi persona të panjohur tentuan të hyjnë në godinën e këtij televizioni në Tiranë. Pak kohë pas sulmit, që ndodhi një orë pas mesnate, në autostradën aty pranë u gjet një “Range Rover” i djegur, i cili dyshohet se është përdorur nga autorët për të sulmuar zyrat e televizionit. Në automjetin e djegur është edhe kallashnikovi i përdorur në sulm. Një punëtor 60-vjeçar ka mbetur i vrarë dhe ka ndërruar jetë rrugës për në spital. Nuk dihet ende motivi i sulmit të ndodhur në hyrjen kryesore të “Top Channel”. Gjatë gjithë natës në Tiranë është organizuar gjueti për sulmuesit dhe policia ka ngritur postblloqe në të gjithë qytetin.
Si ndodhi ngjarja?
Ngjarja ndodhi rreth orës 01:00, ku persona ende të paidentifikuar, u afruan me një automjet tip ‘Range Rover’ ma targa të vjedhura dhe hapën zjarr në drejtim të Top Channel. Në vendin e ngjarjes janë sekuestruar të paktën 25 gëzhoja kallashnikovi, ndërsa një nga plumbat ka përfunduar në trupin e punonjësit, duke i marrë jetën.
Pas ngjarjes, autorët janë larguar, ndërsa në aksin Tiranë-Durrës është gjetur automjeti që kanë përdorur në krim bashkë me dy armë tip kallashnikovi.
Nuk dihen ende shkaqet e ngjarjes së rëndë, ndërsa rasti po hetohet nga policia.
