Të paktën 25 persona kanë humbur jetën dhe dhjetëra të tjerë janë plagosur nga tornadot që goditën orët e fundit shtetin e Mississippi-t, në skajin jugor të SHBA-ve.
“Kjo është një tragjedi”, tha guvernatori i shtetit Tate Reeves në një postim në Tëitter, duke iu referuar tornadove vdekjeprurëse që bënë kërdinë në një rreze prej rreth 150 kilometrash.
Presidenti amerikan Joe Biden foli për imazhe zemërthyese dhe siguroi se qeveria federale do të bëjë “çdo gjë që mundet për të ndihmuar” të prekurit “për aq kohë sa duhet”.
Në Rolling Fork, një qytet me rreth 2,000 banorë në Misisipin perëndimor, blloqe të tëra të qytetit u rrafshuan, mbeturinat u shpërndanë nëpër rrugë, makinat u përmbysën dhe pemët u shkulën.
“Ajo mori me vete pothuajse gjithçka”, tha Patricia Perkins. “Shumica e dyqaneve janë rrafshuar”, shtoi ajo.
Aaron Rigsby, një ndjekës i tornadove, tha se ai mbërriti të premten në mbrëmje në zonë dhe dëgjoi “ulërimat e njerëzve të bllokuar në rrënoja, duke bërë thirrje për ndihmë”.
Ai i tha AFP-së se si liroi dy gra që gjeti në rrënojat e shtëpive të tyre. E para ishte shtypur nga çatia e shtëpisë së saj, ndërsa e dyta u gjet e bllokuar mes një divani dhe frigoriferit.
Duke folur për CNN, kryebashkiaku i Rolling Fork tha: “Qyteti im është zhdukur.. Shtëpitë e rrënuara mund të zëvendësohen, por nuk mund të zëvendësojmë një jetë”.
Siç raportoi ABC më herët, të paktën 13 njerëz u vranë në qarkun Sharkey, tre në kontenë Carroll, dy në kontenë Monroe dhe një në kontenë Humphreys.
Stuhi të forta goditën gjithashtu Alabamën fqinje, ku një burrë vdiq kur shtëpia e tij lëvizëse u përmbys.
Shtetet qendrore dhe jugore të SHBA-së shpesh goditen nga tornadot. Në dhjetor 2021, rreth 80 njerëz u vranë nga tornadot që goditën Kentakin.
