Enkelejd Alibeaj ka mbledhur sot grupin e tij, që tashmë mban logon e Partisë Demokratike, në ambientin që ka marrë me qira në ish-Bllok, që e kosnideron selinë e re të partisë.
Në mbledhjen e grupit “Alibeaj” po diskutohet për kandidaturat e 14 majit, por në mesin e deputetëve që janë rreshtuar pranë këtij fraksioni, ka rezerva për mënyrën si do të hyjnë në zgjedhjet lokale.
Grupi është i ndarë në dy pjesë, pasi disa mendojnë se duhet të garojnë vetëm me emra për Këshillat Bashkiakë, ndërsa ka edhe nga ata që mendojnë se duhet të dalin në garë me kandidatë pavarësisht se do t’iu duhet të sfidojnë përveç Ramës dhe 61 emrat e dalë nga “Primaret”.
Ndër emrat më që kërkojnë të mos nxjerrin kandidatë për kryetarë bashkie në mënyrë që PD të shkojë e bashkuar, janë Jorida Tabaku, Gazment Bardhi, Dhurata Çupi, Dashnor Sula, Saimir Korreshi, Falmur Hoxha e Bledion Nallbati.
“Kam ndarë të njëjtin qëndrim që kisha në shtator, opozita duhet të dalë me kandidatë unikë! Nuk duhet në asnjë mënyrë qe ne të bëjmë betejë kundër nesh, ne kemi një kundërshtar kemi qeverinë dhe asnjë arsye dhe asnjë justifikim të jemi ne ata që përçajnë votën e opozitës!
Ne duhet të mbrojmë logon e PD, duhet të nxjerrim Partinë Demokratike si alternativë në këto zgjedhje! Unë nuk e bëj dot që të kërkoj votën kundër komenteve të mia! Unë nuk kam asnjë dyshim që ne për të fituar duhet të jemi bashkë, duhet të jemi dhe më shumë se kaq”, është shprehur Tabaku në mbledhje.
Ndërkohë, Dhurata Çupi ka shprehur frikën se strukturat e këtij fraksioni të PD mund të mos jetë më unike pas vendimit për të hyrë apo jo në zgjedhje me kandidatë të veçantë.
“Fakti që kemi mendim po thuajse gjysmë për gjysmë, kemi rrezikun që të ndahemi edhe një herë e mund të zvogëlohemi përsëri. Kjo është përgjegjësi direkt juaja, Enkelejd dhe Gazment. Ju duhet të jeni përbashkues”, është shprehur ajo.
Më tej ajo ka shtuar: “Ne kemi optimizmin të dalim me listën e këshillave bashkiak dinjitozë dhe figura dinjitoze dhe të votohemi shumë më shumë se partitë e tjera. Ndërkohë, nuk duhet të dalim me kandidatura për kryetar bashkie. Dhe këtë e kam për të mirën e PD dhe të bashkimit”.
Sa i përket deputetëve që kërkojnë të dalin me kandidatë për zgjedhjet lokale, ata janë Orjola Pampuri, Arbi Agalliu e Kreshnik Çollaku.
