Presidenti serb Aleksandar Vuçiç thotë se lëshimi i një urdhër-arresti ndërkombëtar për presidentin e Rusisë, Vladimir Putin, “do të ketë pasoja të rënda politike” dhe do të shërbejë vetëm për të zgjatur luftën në Ukrainë.
Komentet e Vuçiçit vijnë pas një urdhër-arresti të lëshuar nga Gjykata Ndërkombëtare Kriminale (ICC) të premten, për krime të dyshuara lufte.
Por Vuçiç, i cili më parë ka pasur lidhje të ngushta me Putinin dhe ka qenë kundërshtar i zëshëm i gjykatave ndërkombëtare për krimet e luftës, thotë se ky ishte një vendim i keq.
Ai u tha gazetarëve në Beograd se urdhër-arresti “do të ketë pasoja të rënda politike” dhe tregon se “ka një ngurrim të madh për të folur për paqen (dhe) për armëpushimin” në Ukrainë.
“Pyetja ime është tani që e keni akuzuar për krimet më të mëdha të luftës, me kë do të flisni tani?”, shtoi zoti Vuçiç.
“A mendoni vërtet se është e mundur të mposhtet Rusia në një muaj, tre muaj apo një vit?”, tha më tej ai.
