Një shpërthim me lëndë plasëse ka tronditur Athinën në orët e para të mëngjesit të kësaj të marte.
Shpërthimi i fuqishëm shkatërroi një ushqimore në periferinë veriore të Nea Erythraia, rreth orës 03:00. Persona të paidentifikuar të hipur në një motoçikletë iu afruan dyqanit që ndodhet në kryqëzimin e rrugëve Venizelou dhe Strofyliou, thyen xhamin e biznesit dhe hodhën në ambientet e brendshme një sasi të konsiderueshme lënde plasëse me fuqi të lartë.
Shpërthimi shkatërroi panelet e xhamit dhe shkaktoi dëme të mëdha brenda ushqimores. Mediat greke publikuan pamjet pas shpërthimit të fuqishëm, ku punonjësit e dyqanit shihen duke fshirë xhamat e thyer dhe produktet e shpërndara në trotuar.
Nuk dihet arsyeja pse u vu në shënjestër biznesi në fjalë.
Një klient raportoi për mediat greke se bëhej fjalë për larje hesapesh. Pronarët e biznesit familjar, nga ana e tyre, pohojnë se në të kaluarën nuk kanë marrë kërcënime dhe as kanë pasur ndonjë konflikt.
Policia ka mbledhur kamerat e sigurisë në zonë dhe po vijon punën për identifikimin dhe kapjen e autorëve.
