Tre viktima dhe tre të plagosur ishte bilanci i aksidentit të rëndë që ndodhi pasditen e djeshme në nënkalimin pranë qendrës tregtare TEG, teksa një automjet tip “Audi A8” i drejtuar nga 20-vjeçari Klevis Ruçaj, që me shpejtësi skëterrë përfundoi mbi kofanon e një makine tjetër tip “Honda”.
Drejtuesi i mjetit ndërroi jetë pak orë më vonë në spital, ndërsa të vdekura në vendngjarje mbetën dy vajza, identifikimi i të cilave është bërë i mundur vetëm sot.
Mësohet se dy pasagjeret që udhëtonin me “Audi A8” që drejtohej nga Ruçaj, janë shtetaset Erisilda Abedini (22 vjeçe) dhe Sikela Përroj (23 vjeçe).
Automjeti që vinte me shpejtësi skëterrë nga drejtimi i Farkës ka çarë barrierat e mbikalimit dhe ka rënë mbi kofanon e një mjeti tjetër që po udhëtonte në nënkalim në autostradën Tiranë-Elbasan.
Tre personat që ndodheshin në automjetin tip “Honda”, ndërkohë raportohet se janë në spital duke u trajtuar ende me ndihmë mjekësore.
“Rreth orës 17:55, në rreth-rrotullimin pranë qendrës tregtare ‘TEG’, ka ndodhur një aksident rrugor ku janë përfshire automjeti tip ‘Audi’ dhe automjeti tip ‘Honda’.
Referuar mekanizmit dhe të dhënave paraprake dyshohet se automjeti tip ‘Audi’ me drejtues shtetasin Klevis Ruçaj, 20 vjeç, ka qenë duke udhëtuar ne unazën lindore me drejtim lëvizje nga Farka për tek rreth-rrotullimi pranë Teg.
Pasi ka humbur kontrollin duke thyer barrierat rrethuese te mbikalimit, ka përfunduar në autostradën Tiranë-Elbasan, duke aksidentuar automjetin tjetër tip ‘Honda’, me drejtues shtetasin Qemal Kurti, rreth 60 vjeç”, njoftoi mbrëmjen e djeshme policia.
