“Killeri” Dan Hutra, i cili vrau tre gra dhe plagosi tre të tjera më 1 mars në Tiranë, përveç jetës së kaluar mes krimeve dhe burgut, duket se ka qenë e keqja më e madhe e familjes së tij.
Teksa vëllai i 40-vjeçari tregoi mbrëmjen e djeshme mes lotëve se pjesa e mbetur e familjes së tyre mori arratinë pasi i druhej frikës se Dani mund t’i vriste dhe pohoi se prej vitit 2006 kanë shkëputur çdo kontakt me të, për mediat ka folur sot e motra e autorit të masakrës në Paskuqan.
Motra e tij Asija e nisi komunikimin e saj telefonik në emisionin “Me zemër të hapur duke u shprehur ngushëllime familjeve të viktimave dhe duke nënvizuar se nuk do t’a falë kurrë vëllain e saj.
Sipas Asijes, e gjithë familja Hutra (nëna, vëllezërit, nipër e mbesa) janë tronditur nga vrasjet macabre të 40-vjeçarit.
“Unë nuk do ia fal kurrë Dan Hutrës. Ngushëllimet e mia ndaj familjes së viktimës. Më vej të qaj se jam shumë e mërzitur dhe më vjen të qaj. Dan duhet të marrë dënimin e merituar. Të më dëgjoi Dani ‘vëlla i dashur nuk pate rrugë tjetër përveç se të vrisje vajza? Nuk mendove se ke motra? Turp nuk ke o vëlla? Nuk mendove për nënën? Nuk të erdhi turp që ia ktheve me kaq egërsirë? Sikur i gjithë populli shqiptar ta falë, nuk do e bëj”, tha ajo.
Motra e 40-vjeçarit ka folur edhe për vrasjen e gruas së parë në zonën e ish-fushës së Aviacionit, për të cilën Dan Hutra u dënua, duke thënë se pasi ka dalë nga burgu pas vrasjes së Dafinës, ai ka kërkuar të vazhdojë jetën dhe të martohet.
“Ata që e kanë bërë këtë, nuk di çfarë të them. Nëse Dafina e ka tradhtuar Danin atëherë ai duhet t’a linte Dafinën dhe të vazhdonte rrugën e tij. Por unë nuk besoj ta ketë tradhtuar. Dani është arrestuar dhe u fut në burg, unë i kam thënë fjalët e mia si motra më e madhe. I kam thënë përse nuk e vrarë vetën. Vëllezërit janë distancuar nga Dani. Nënën time Dani e ka varrosur për së gjalli, më pas ne të tjerëve, motra e vëllezër , nipër e mbesa. Doli nga burgu , mori shtëpi me qira dhe na thonte më gjeni një nuse që të vazhdojnë jetën përpara. Një ditë me merr në telefon dhe më thotë, motër do të fejohem”, tha ajo, duke shtuar: “Më tregoi se duke ecur ajo me biçikletë iu gris qesja e ushqimeve dhe e ndihmova dhe aty vazhdoi lidhja jonë. Më pas u bëmë bashkë dhe ia kemi kaluar shumë mirë. Bëri një drekë të vogël. Në Tiranë mori një shtëpi me qira dhe kështu vazhdoi”, rrëfeu Asija.
Duke iu referuar protestës së 2 Marsit në Tiranë, 24 orë pas masakrës që kreu Dan Hutra, motra e tij tha: “Stop dhunës ndaj vajzave dhe grave”.
Më tej u shpreh se nuk arrinte të kuptonte se si vëllait të saj, nuk i erdhi keq për nënën e tyre dhe gjithë dhimbjen që shkaktoi, pasi familjen “e ka varrosur për së gjalli”.
“Më ka bërë përshtypje se në protestën e 2 marsit kam dëgjuar që ‘do marrim peng motrat e Dan Hutrës’. Asnjë motër nuk do donte të ndodhej në këtë pozitë. Çdo femër haset me dhunë në familje por nuk shprehet për shkak të mentalitetit. Që nga data 1 mars ushqehem sa për te jetuar nga minuta në minutë. I shpreh ngushëllimet më të sinqerta dhe bëj lutje që të bëjmë paqe. Nuk i erdhi keq për nënat që ua mori vajzat? Nuk të erdhi keq që ke motër vetë? Nuk të erdhi keq për nënën tënde që ka ngelur në qoshe?”, tha më tej Asija.
