Seanca paraprake në GJKKO për ish-ministrin e4 Mbrojtjes Fatmir Mediu në kuadër të rihapjes së hetimeve për çështjen Gërdeci, është shtyrë për në datën 23 mars, në orën 14:00.
Ish-ministri nuk ishte prezent në sallën e gjyqit, por Zamira Durda, e cila humbi të birin 7-vjeçar në tragjedinë e vitit 2008 dhe kallëzoi Mediun në SPAK duke çuar në rihapjen e hetimeve, u paraqit së bashku me familjarë të tjerë dhe avokatin Dorian Matlija.
Durda foli për mediat pasi doli nga salla e gjyqit, duke u shprehur se kërkon drejtësi për vdekjen e të birit.
“Thjesht kërkoj drejtësi. Të vendoset drejtësia dhe të më japi një përgjigje pse djali, Erisoni nuk jeton. Kaq kam kërkuar”, tha ajo.
E pyetur nga gazetarët nëse akuza e ngritur nga SPAK ndaj Fatmir Mediut për shpërdorim detyre është e mjaftueshme, ajo u përgjigj duke thënë se ish-ministri duhet të akuzohet për “shpërdorim detyre me pasojë vrasjen”.
“Për mua nuk është një akuzë e mjaftueshme, e kam thënë edhe herë të tjera. Dhe duhet shpërdorim detyre me pasojë vrasjen e një apo më shumë personave. Këtu duhet të vazhdojë. Gjithsesi, do ta pranoj. Kam 15 vjet, thjesht dua një përgjigje, pse Erisoni nuk jeton më? Këtë kam kërkuar që ky të hetohet me të njëjtat prova dhe të marri o fajësi o pafajësi”, tha Zamira Durda për mediat pasi u mor vendimi për shtyrjen e seancës.
Ndërsa, avokati Dorian Matlija nënvizoi se fakti që çështja po shqyrtohet, është diçka pozitive.
“Jemi në një epokë tjetër ku çështjet mund të gjykohen. Kjo është pjesa më e rëndësishme për momentin. Pastaj, sesi do zhvillohet procesi, nëse do na ngrihet apo ulet besimi te drejtësia, do shohim vijimin e procesit. I gjithë hetimi është pjesë sekrete dhe prokurorët nuk e kanë ndarë informacionin”, deklaroi avokati.
