Familjarët e “mbretit” të lojërave të fatit Ervis Martinaj kanë ankimuar vendimin e Gjykatës së Posaçme për sekuestrimin e 34 pasurive të tij, duke kërkuar rikthimin e aksesit mbi to.
Ankimimi është depozituar ne Apelin e GJKKO dhe pritet hidhja e shortit për caktimin e gjyqtarit dhe caktimin e një date për shqyrtimin e kësaj kërkese.
Kujtojmë se pasuritë e të shumëkërkuarit të drejtësisë dhe familjarëve të tij, që kapin vlerën e disa milionë eurove, u sekuestruan më 15 shkurt me urdhër të SPAK.
Pasuritë që gjykata ka miratuar për sekuestro janë biznese, toka, prona, makina, apartamente dhe llogari bankare.
Vendimi erdhi në kuadër të hetimeve për operacionin “Plumbi i Artë” pas arrestimit të Nuredin Dumanit.
Tre prokurorët e çështjes, Altin Dumani, Dolorez Musabelli dhe Behar Dibra kërkuan sekuestrimin e këtyre pasurive me argumentin se ata nuk e justifikojnë burimin e të ardhurave, kërkesë e cila u pranua nga GJKKO.
