Dora gjakatare e “killerit” Dan Hutra i mori familjes Hysa dy nga gratë që ndodheshin në banesë në datën 1 Mars. 40-vjeçari me kallashnikov vrau Mevlute Hysën 30 vjeçe (motra e ish-bashkëjetueses së tij) dhe Hasime Dafku 30 vjeçe (e fejuara e vëllait të ish-bashkëjetueses), si dhe plagosi ish-bashkëjetuesen Elena Hysa 35 vjeçe dhe nënën e saj Kujtime Hysa 60 vjeçe.
Nga vrasjet e Dan Hutrës në familjen Hysa në Kodër Kamëz, Erjon Hysa humbi bashkëshorten shtatzënë dhe motrën e tij. Ndërsa iu plagos motra tjetër Elena Hysa, dhe nëna.
Në një intervistë për “Uniko”, Erjon Hysa ka rrëfyer së ndodhej në Gjermani duke punuar në një skelë ndërtimi në momentin kur mori lajmin e kobshëm. Ai jeton dhe punon në Gjermani, ndërsa tregon se ka qenë një mik i tyre, i cili ka telefonuar vëllain e Erjonit, i cili ka shpërthyer në të bërtitura dhe lot.
Sa i përket raportit të tij me Dan Hutrën, Erjon Hysa shprehet se nuk e ka takuar kurrë por ka folur vetëm një herë në telefon dhe nuk kishte përshtypje pozitive për ish-kunatin.
PJESË NGA INTERVISTA
Spartak Koka: Ti ke humbur dy pjesëtarë shumë të rëndësishëm.
Erjon Hysa: Kam humbur motrën edhe nusen. Nusja ka qenë shtatzënë 2 muajshe.
Spartak Koka: Ti ku ke qenë?
Erjon Hysa: Kam qenë në Gjermani.
Spartak Koka: Si e more vesh lajmin?
Erjon Hysa: Unë kam qenë në punë atë ditë, kam qenë në skelë. Kanë marrë vëllain në telefon, një shoku i vetë, edhe kur e dëgjoj vëllain duke bërtitur. Çfarë është? S’po më tregonte. Zbrita atje, ai po qante me të madhe. Edhe kur më ka treguar se ka vdekur Lutja (motra) dhe Hasimja (nusja). I kanë vrarë.
Spartak Koka: Kur kishte folur për herë të fundit me të?
Erjon Hysa: Kisha folur në mëngjes.
Spartak Koka: Asnjë kërcënim, asnjë rrezik të papritur?
Erjon Hysa: Jo jo pabesi. Se të ishte ashtu, kisha ardhur.
Spartak Koka: Me Dan Hutrën je takuar ndonjëherë?
Erjon Hysa: Jo asnjëherë.
Spartak Koka: Ke folur ndonjëherë në telefon?
Erjon Hysa: Në telefon kam folur vetëm një herë. Edhe kur kam folur, ai njeri s’më ka pëlqyer.
Spartak Koka: Përse?
Erjon Hysa: S’e di. Më tregonte dhe motra se kur del i jep makinës shpejt, ecën me shpejtësi.
