Deputeti demokrat Falmur Noka shprehet se regjistrimi në zgjedhje i siglës së PD me autorizimin e Lulzim Bashës është tregues i qartë i tentativës së mbajtjes peng të PD për llogari të Edi Ramës.
“Është e paprecedentë, kur një kryetar partie jep dorëheqjen dhe autorizon partinë për t’u regjistruar në zgjedhje. Ky është veprim prej pengu”- tha Sekretari i Përgjithshëm i PD Flamur Noka në emisionin “Pa Censurë” në RTSH.
Megjithëse sot 2 kërkesa të ndryshme u depozituan në KQZ për regjistrim, nga PD dhe grupi Alibeaj, Flamur Noka nuk e sheh të pamundur opsionin e përdorimit të vulës aktuale. Por që kjo të ndodhë, sipas tij, duhet që më parë të plotësohen 2 kushte, që lidhen me Lulzim Bashën dhe Enkelejd Alibeajn.
“Nuk ka refuzim për bashkëpunim me grupimin tjetër. Basha dhe Alibeaj që i shërbejnë Edi Ramës dhe rrënimit të opozitës dhe që janë në shërbim të likuidimit të PD, të jenë pjesë e këtij procesi. Kushdo tjetër nga kolegët tanë deputetë është i mirëpritur”, tha Noka duke iu përgjigjur pyetjes pse kanë refuzuar edhe këto ditë daljen me kandidatë te përbashkët dhe përdorimin e vulës së PD në zgjedhje.
Flamur Noka e pranoi që bisedimet nuk janë kryer me Bashën dhe Alibeajn. Ai ka një përgjigje se pse nuk gjendet gjuha e bashkëpunimit as me këta deputetë që kanë mendim ndryshe në PD për të përdorur vulën e partisë në zgjedhje.
“Përsa kohë kolegët e tjerë rrinë nën çadrën e Bravës (Basha) dhe Alibashës (Alibeaj), e them me keqardhje, por ata vazhdojnë të jenë në shërbim të pengjeve. Kjo gjë duhet ndarë. Pastaj mendim ndryshe, mendim kundër, PD është e hapur”, tha Flamur Noka.
